Զելենսկին հայտնել է, թե ինչպես է օգնել Մերձավոր Արևելքի երկրներին Իրանի դեմ պայքարում
Ուկրաինան մի քանի Մերձավոր Արևելքի երկրի ցույց է տվել, թե ինչպես կարող են ուկրաինական որսացող սարքերն օգնել՝ չեզոքացնելու Իրանի կողմից արձակված «Շահեդ» անօդաչու թռչող սարքերը։ Այս մասին նա ասել է լրագրողների հետ զրույցում, որից հատվածներ է մեջբերել X-ում։
«Մենք մեր ռազմական փորձագետներին ուղարկեցինք Մերձավոր Արևելք, այդ թվում՝ անօդաչու թռչող սարքերի և էլեկտրոնային պատերազմի մասնագետների։ Մենք որոշ երկրների ցույց տվեցինք, թե ինչպես աշխատել անօդաչու սարքերի հետ», – նշել է Զելենսկին։
Նրա խոսքով՝ Ուկրաինան աջակցության և փորձի փոխանակման դիմաց կստանա խափանող սարքեր՝ էներգետիկ ենթակառուցվածքները պաշտպանելու համար, ինչպես նաև կունենա ֆինանսական պայմանավորվածություններ։
«Կան նաև նավթի և դիզելային վառելիքի մատակարարումներ Ուկրաինայի համար»,- նշել է նա՝ հավելելով, որ Ուկրաինան օգնում է ամրապնդել Պարսից ծոցի երկրների անվտանգությունը՝ Ուկրաինայի դիմադրողականությանը նպաստելու դիմաց։
Զելենսկու գրառման մեջ նաև նշվում է, որ Ուկրաինան տասնամյա համաձայնագրեր է կնքել Մերձավոր Արևելքի երեք երկրի հետ։
«Մենք տասնամյա համաձայնագրեր ենք կնքել երեք երկրի հետ։ Ուկրաինական ընկերությունները կհամագործակցեն այդ երկրների զինված ուժերի հետ՝ որոշակի օբյեկտներ պաշտպանելու համար։ Իմ խնդիրն է բանակցել զենքի ծավալների, ծառայությունների և տեսակների շուրջ։ Անվտանգության վերաբերյալ բանակցություններ են ընթանում Օմանի հետ, և մենք նաև բանակցություններ ենք վարում Քուվեյթի և Բահրեյնի հետ՝ սա լրացնում է այդ երկրների հետ արդեն կնքված համաձայնագրերը, որոնք բոլորը տեսել են», – հավելել է նա։
Զելենսկին նախորդ շաբաթ այցելել էր Մերձավոր Արևելք։ Նա պաշտպանության և անվտանգության համաձայնագրեր է ստորագրել Սաուդյան Արաբիայի, Կատարի և ԱՄԷ-ի հետ:
