Ստորագրահավաք` ծառասպանդը դադարեցնելու պահանջով. Հայտարարություն
«Բնություն հանուն առողջության» նախաձեռնող խումբը հայտարարություն է տարածել Երևան քաղաքում մեծ ծավալների, առանց մասնագիտական հիմնավորման ծառահատումների վերաբերյալ, որում ասվում է. «Սիրելի՛ երևանցիներ,
Երևանում ծառահատումները և անառողջ էտը դարձել են քաղաքի աղետի սպառնալիք։
Մենք` Բնություն հանուն առողջության նախաձեռնության անդամներս, առաջարկում ենք` սկսել ստորագրահավաք, որը կուղղվի Երևանի քաղաքապետարանին` պահանջով, դադարեցնել ծառասպանդը և Երևանի կլիմային ո’չ համապատասխան ծառերի տունկը, որը չի բավարարում մայրաքաղաքի կանաչ գոտու պահանջներին։
Հիշեցնենք, որ Երևանում մեկ անձի շնչով կանաչ գոտու հասանելի չափը պետք է լինի 28,8 քմ, ինչն այսօր չի համապատասխանում միջազգային և տեղական չափորոշիչներին։
Կանաչ տարածության ու ծառերի պակասի հետևանքով օդի որակը սաստիկ կեղտոտ է, փոշու պարունակությունը գերազանցում է սահմանային թույլատրելի կոնցենտրացիան, ինչպես վկայում է Օթերևութաբանության և մոնիթորինգի կենտրոնը։
Հաջորդ սպասվող աղետը` ամառվա տապին ստվերի պակասն է, ինչը նախորդ տարի ակնառու էր, այս տարի ավելի դաժան կլինի։ Նշենք, որ օդի 35°-ի դեպքում արևի տակ ջերմաստիճանը կարող է հասնել մինչև 50C°, մինչդեռ ստվերում ջերմաստիճանը պահպանվում է, անգամ զով է։
Բացի այդ, քաղաքը տեսողական առումով նույնպես տուժում է։ Կանաչի պակասն ու քարի, իսկ վերջին տարիներին ակտիվորեն կառուցվող ապակե շենքերի ֆոնին առաջ քաշելով ճնշող զգացողություն։ Սա ո’չ միայն ճարտարապետական տեսանկյունից է վանող, այլև հոգեբանորեն ճնշող զգացողություն է առաջացնում։
Այսպիսով, Երևանի քաղաքապետարանից պահանջում ենք` դադարեցնել ծառերի սպանդը, ձեռնարկել ամայացած տարածքների կանաչապատման ու ոռոգման պատշաճ կազմակերպում։
Ստորագրել կարող եք ներքևում` նշելով Ձեր անուն, ազգանունը։
Ծառը կյանք է։
«Բնություն հանուն առողջության» նախաձեռնող խումբ»:
