ԱՄՆ-ն հաստատել է ԵՄ-ի հետ առևտրային համաձայնագիրը պահպանելու իր մտադրությունը

Միացյալ Նահանգները հաստատել է Եվրամիության հետ գործող առևտրային համաձայնագրին հավատարիմ մնալու իր մտադրությունը՝ չնայած Եվրոպայում և Վաշինգտոնում առկա մտահոգություններին, որ համաձայնագիրը կարող է վտանգի տակ լինել: Այս մասին հաղորդում է Politico-ն՝ հղում անելով բանակցություններին ծանոթ աղբյուրներին։

Թերթի տվյալներով՝ ԱՄՆ ֆինանսների նախարար Սքոթ Բեսենթը հեռախոսազրույցի ժամանակ վստահեցրել է եվրոպական առևտրի հանձնակատար Մարոշ Շեֆչովիչին, որ Վաշինգտոնը մտադիր է պահպանել համաձայնագրի պայմանները։

Շեֆչովիչի շրջապատը Politico-ին հաստատել է, որ կողմերը վերահաստատել են ԱՄՆ-ԵՄ համատեղ հայտարարության մեջ նշված պարտավորությունները կատարելու իրենց հանձնառությունը: ԵՄ հանձնակատարը նաև բանակցություններ է վարել ԱՄՆ առևտրային ներկայացուցիչ Ջեյմիսոն Գրիրի հետ: