Իրաքի իսլամական դիմադրությունը հայտնել է տարածաշրջանի ամերիկյան ռազմաբազաների վրա մեկ օրում հասցված 23 հարվածների մասին
«Իրաքի իսլամական դիմադրություն» (IRI) խմբավորումը շաբաթ օրը հայտարարել է, որ վերջին 24 ժամվա ընթացքում 23 գործողություն է իրականացրել երկրում և ողջ տարածաշրջանում գտնվող ԱՄՆ ռազմական բազաների դեմ, հայտնում է Shafaq News-ը:
Իր հայտարարության մեջ իրանամետ խմբավորումը հայտնել է, որ հարձակումների ընթացքում տասնյակ անօդաչու թռչող սարքեր և հրթիռներ են կիրառվել՝ «թշնամու բազաներին» հարվածներ հասցնելու համար:
Ուրբաթ օրվա ընթացքում խմբավորումը 27 օդային հարված է իրականացրել։ Դրանից մեկ օր առաջ 29 հարված է հասցվել ԱՄՆ-ի ռազմական օբյեկտների ուղղությամբ։
Հիշեցնենք, որ ԱՄՆ-ն և Իսրայելը փետրվարի 28-ից հարվածներ են հասցնում Իրանի տարածքին, ինչը հանգեցրել է ավերածությունների և մարդկային զոհերի: Ի պատասխան՝ Իրանը հրթիռային հարվածներ է հասցնում Իսրայելին և տարածաշրջանում ԱՄՆ-ի ռազմաբազաներին: Իսրայելի և ԱՄՆ-ի հարձակման ժամանակ սպանվել են նաև Իրանի հոգևոր առաջնորդ այաթոլլա Ալի Սեյեդ Խամենեին և երկրի այլ բարձրաստիճան պաշտոնյաներ:
Մարտի 2-ին Իսրայելի դեմ պատերազմի մեջ է մտել նաև «Հեզբոլլահ» շարժումը: Իսրայելը հայտնել է շարժման դեմ հարձակողական գործողության մեկնարկի մասին և ներխուժել հարավային Լիբանան:
