Կոնգրեսը փորձում է շտապ հավելյալ տեղեկություններ ստանալ Թրամփի՝ Իրանին հասցրած հարվածների մասին
Կոնգրեսը փորձում է շտապ տեղեկություններ ստանալ Իրանին հասցված հարվածների և Մերձավոր Արևելքում նախագահ Դոնալդ Թրամփի երկարաժամկետ ռազմավարության մասին։ Ըստ Politico-ի, հաջորդ շաբաթ նախատեսվում են քվեարկություններ՝ հետագա ռազմական գործողությունները սահմանափակելու վերաբերյալ։
Ըստ երկու աղբյուրի, կիրակի օրը Թրամփի վարչակազմի ներկայացուցիչները ճեպազրույց կանցկացնեն Կոնգրեսի առանցքային հանձնաժողովների աշխատակիցների համար։ Նախատեսվում է Ներկայացուցիչների պալատի հետախուզության, զինված ուժերի և արտաքին գործերի հանձնաժողովների մասնակցությունը։ Կոնգրեսականների օգնականները հայտնել են, որ այս հանգստյան օրերին կտեղեկացվեն նաև Սենատի արտաքին հարաբերությունների և հետախուզության հանձնաժողովների աշխատակիցները։
Սենատում հանրապետական մեծամասնության առաջնորդ Ջոն Թյունը նույնպես հասկացրել է, որ ակնկալում է վարչակազմի ներկայացուցիչների այցը Կոնգրես՝ Թրամփի գործողությունները քննարկելու համար։
«Ակնկալում եմ, որ վարչակազմի ներկայացուցիչները բոլոր սենատորներին կտեղեկացնեն այս ռազմական գործողությունների մասին»,- հայտարարել է Թյունը։
Դեմոկրատներն ավելին են պահանջում։ Սենատում դեմոկրատական փոքրամասնության առաջնորդ Չակ Շումերը հայտարարել է, որ բացի փակ ճեպազրույցից, վարչակազմի ներկայացուցիչները պետք է հրապարակային ցուցմունքներ տան Կոնգրեսի հանձնաժողովներում։ «Վարչակազմը Կոնգրեսին և ամերիկացի ժողովրդին չի տրամադրել կարևոր մանրամասներ սպառնալիքի մասշտաբների և հրատապության վերաբերյալ»,- հավելել է Շումերը։
Օրենսդիրների լայն շրջանակին տեղեկացնելու շտապողականությունը պայմանավորված է նրանով, որ Ներկայացուցիչների պալատի և Սենատի երկկուսակցական կոալիցիաները մտադիր են հաջորդ շաբաթ քվեարկության դնել նախագծեր, որոնք սահմանափակում են Իրանի դեմ առանց Կոնգրեսի հավանության հետագա ռազմական գործողություններ ձեռնարկելու Թրամփի լիազորությունները։
Սենատում քվեարկությունը սպասվում է երեքշաբթի, իսկ Ներկայացուցիչների պալատում՝ չորեքշաբթի կամ հինգշաբթի։
Կոնգրեսական Թոմաս Մեսին (հանրապետական, Կենտուկի), որը հաճախ է քննադատում Թրամփին և ռազմական լիազորությունների վերաբերյալ քվեարկության նախաձեռնողներից է, հարվածներն անվանել է «պատերազմական գործողություններ, որոնք Կոնգրեսը չի արտոնել»։
Ընդհանուր առմամբ, հարվածների վերաբերյալ արձագանքները բաժանվել են ըստ կուսակցական պատկանելության։ Հարվածներին առաջինն արձագանքած դեմոկրատներից սենատոր Ռուբեն Գալյեգոն (Արիզոնա) սոցցանցերում դատապարտել է հարձակումը՝ գրելով․ «Կարող ենք աջակցել ժողովրդավարական շարժմանն ու իրանցի ժողովրդին՝ առանց մեր զինվորներին մահվան ուղարկելու»։
Սենատի հետախուզության հանձնաժողովի առաջատար դեմոկրատ Մարկ Ուորները (Վիրջինիա) շաբաթ օրը հայտարարել է, որ Իրանի բարձրագույն ղեկավարությանը հասցված գիշերային հարվածները «չափազանց լուրջ որոշում են, որը կարող է Միացյալ Նահանգներին ներքաշել Մերձավոր Արևելքում մեկ այլ մասշտաբային հակամարտության մեջ»։
Ներկայացուցիչների պալատի հետախուզության հանձնաժողովի առաջատար դեմոկրատ Ջիմ Հայմսը (Կոնեկտիկուտ) Թրամփի գործողությունները անվանել է «պատերազմ՝ սեփական հայեցողությամբ, առանց ռազմավարական վերջնական պլանի» և հայտնել է, որ կաջակցի ռազմական լիազորությունների մասին բանաձևին, երբ այն քվեարկության դրվի հաջորդ շաբաթ։
Կոնգրեսի հանրապետականները, ներառյալ ղեկավար կազմն ու առանցքային հանձնաժողովների նախագահները, արագորեն աջակցել են ԱՄՆ-ի և Իսրայելի համատեղ գործողությանը։ Ներկայացուցիչների պալատի հետախուզության հանձնաժողովի նախագահ Ռիկ Քրոուֆորդը հայտարարել է, որ Թրամփը «Իրանին դիվանագիտական ուղի ընտրելու բավարար հնարավորություններ էր տվել»։ Սենատի երկրորդ ազդեցիկ հանրապետական Ջոն Բարասոն գործողություններն անվանել է «խաղաղություն՝ ուժի միջոցով»։
