ԱՄՆ մաքսային ծառայությունը փետրվարի 24-ից կդադարեցնի ներմուծման մաքսատուրքերի գանձումը
ԱՄՆ մաքսային և սահմանային ծառայությունը հայտարարել է, որ փետրվարի 24-ից կդադարեցնի այն ներմուծման մաքսատուրքերի գանձումը, որոնք ԱՄՆ գերագույն դատարանը փետրվարի 20-ին ճանաչել է անօրինական. հաղորդում է Reuters-ը։
Գերատեսչությունը իր Cargo Systems Messaging Service (CSMS) համակարգի միջոցով տեղեկացրել է, որ համապատասխան տուրքերի կոդերը կակտիվացվեն։ Միևնույն ժամանակ, ԱՄՆ մաքսային և սահմանային ծառայությունը չի պարզաբանել, թե ինչու է դատարանի որոշումից հետո ևս մի քանի օր շարունակել գանձել տուրքերը։
Հաղորդագրության մեջ նաև չի նշվում՝ արդյոք վերադարձվելու են և ինչ կարգով են ներմուծողներին վերադարձվելու արդեն գանձված միջոցները։
Փետրվարի 20-ին ԱՄՆ Գերագույն դատարանը 6 կողմ, 3 դեմ ձայներով որոշել էր, որ ԱՄՆ նախագահը բավարար լիազորություններ չունի «Միջազգային արտակարգ տնտեսական լիազորությունների մասին» օրենքի (IEEPA) համաձայն ներմուծման մաքսատուրքեր սահմանելու համար։ Թրամփը որոշումն անվանել էր խայտառակություն և հայտարարել, որ դատարանը գործում է ի շահ օտարերկրյա պետությունների։Ն
ույն օրը նա հայտարարել էր 150 օր ժամկետով 10 տոկոս գլոբալ մաքսատուրք սահմանելու մասին։ Նախագահի խոսքով՝ նոր մաքսատուրքերը կսահմանվեն 1974 թվականի Առևտրի մասին օրենքի 122-րդ բաժնի հիման վրա և կկիրառվեն արդեն գործող սակագներից վեր։
Այդ դրույթը նախագահին թույլ է տալիս մինչև 15 տոկոս մաքսատուրք սահմանել առավելագույնը 150 օր ժամկետով, եթե առկա են վճարային հաշվեկշռի հետ կապված մեծ և լուրջ խնդիրներ։
