ՀՀ-ի դեմ «հիբրիդային պատերազմը» ՌԴ-ի՞ց է գալիս. Սարգիս Խանդանյանը հստակ չի կարողանում պատասխանել
Այսօր լրագրողների հետ ճեպազրույցում ԱԺ արտաքին հարաբերությունների հանձնաժողովի նախագահ Սարգիս Խանդանյանը, անդրադառնալով ԵՄ-ից տրամադրվող աջակցությանը, նշեց, թե ոչ միայն Հայաստանում, այլև աշխարհում ժողովրդավարությունը հիբրիդային հարձակումների է ենթարկվում տարբեր կողմերից։ Ըստ նրա՝ եվրոպական երկրներն այս առումով ունեն որոշակի գործիքակազմ, որը ցույց է տվել իր արդյունավետությունը։ Ըստ նրա՝ այստեղ որևէ միջամտություն չկա Հայաստանի ներքին գործերին։
«Սա փորձի փոխանակման շրջանակներում է տեղի ունենում»,- ասաց Խանդանյանը։
Նա հակադարձեց ընդդիմադիր գործընկերներին, թե ինչ գնահատական կտան «ռուսաստանցի օլիգարխի միջամտությանը Հայաստանի ներքին կյանքին»՝ նկատի ունենալով Սամվել Կարապետյանին։
Լրագրողները հիշեցրեցին Խանդանյանին, որ Սամվել Կարապետյանը ռուսաստանցի գործարար լինելուց բացի ՀՀ քաղաքացի է։
Լրագրողները հետաքրքրվեցին, թե արդյոք «հիբրիդային պատերազմի սպառնալիքներն իշխանությունները Ռուսաստանի՞ց են զգում»։
Խանդանյանը նշեց՝ ոչ միայն, ըստ նրա՝ հիբրիդային սպառնալիքները և՛ արտաքին են, և՛ ներքին։
