Թաիլանդի ոստիկանությունը ռետինե փամփուշտներ է արձակել կամբոջացի ցուցարարների վրա
Թաիլանդի և Կամբոջայի սահմանին իրադրությունը կրկին սրվել է: Սահմանի վիճելի հատվածի բնակավայրերից մեկում Թաիլանդի ոստիկանությունն արցունքաբեր գազ է կիրառել և ռետինե փամփուշտներ արձակել կամբոջացի ցուցարարների վրա: Միջադեպի հետևանքով վիրավորվել է 23 կամբոջացի:
Այս մասին հաղորդում է Reuters գործակալությունը: Կամբոջացի ցուցարարներն էլ թաիլանդցի ոստիկանների ուղղությամբ քարեր և փայտե մահակներ են նետել: Թաիլանդական կողմը նույնպես հայտնել է վիրավորների մասին, որոնց հստակ թիվը չի նշվում:
Ըստ Reuters-ի՝ կամբողջացի քաղաքացիական անձինք փորձել են հեռացնել Թաիլանդի կողմից օգոստոսին անցկացված փշալարերը: Շաբաթներ շարունակ սահմանի երկու կողմում ցույցեր են տեղի ունեցել: Բախումից ժամեր առաջ սահմանի վիճելի հատված էր այցելել Հարավարևելյան Ասիայի պետությունների ասոցիացիայի ժամանակավոր դիտորդական թիմը:
Սա առաջին զգալի սրումն է երկու երկրի սահմանին տեղի ունեցած հնգօրյա հակամարտությունից հետո, որն ավարտվեց հուլիսի 28-ին՝ հրադադարի կնքմամբ: Հուլիսին տեղի ունեցած սահմանային բախումների հետևանքով առնվազն 48 մարդ էր զոհվել, հարյուր հազարավոր մարդիկ ժամանակավորապես տեղահանվել էին
