«Հերիք չի՝ մեծ ներդրումն են ուզում խլել, նաև չեն կատարում արբիտրաժի որոշումը. Ո՞վ կգա ներդրում անելու». Դավիթ Ղազինյան
Ի՞նչ կլինի, եթե ՀԷՑ-ի վերաբերյալ ՀՀ կառավարությունը չկատարի միջազգային արբիտրաժային դատարանի որոշումը։ Այս հարցն այսօր լրագրողներն ուղղեցին «Հայաստանի էլեկտրական ցանցեր» ՓԲԸ գլխավոր տնօրենի նախկին պաշտոնակատար Դավիթ Ղազինյանին, ինչին ի պատասխան՝ նա ասաց.
«Պատկերացրեք մի իրավիճակ, երբ պետությունը միանում է միջազգային համաձայնագրերի և իր բոլոր միջազգային համաձայնագրերի արբիտրաժների չկատարելը մեկնաբանի անկախ ինչ-որ հանձնաժողովներով կամ դատական համակարգով։
Դատական համակարգը` որպես անկախ մարմին, բոլոր ժողովրդավարական երկրներում պետք է լինի ամենաանկախը, այսինքն՝ երրորդ իշխանությունն է։ Աշխարհի բոլոր երկրներն ունեն անկախ մարմիններ, այդ թվում՝ դատարաններ, սա նշանակում է, որ արբիտրաժի կամ ՄԻԵԴ-ի, միջազգային յուրաքանչյուր դատարանի որոշում կարող են չկատարել՝ հիմնավորելով, որ անկախ մարմին է, և մենք չենք կարող ստիպել։ Համոզված եմ, որ սա միջազգային ատյանների կողմից լուրջ չի նայվելու»։
Դավիթ Ղազինյանը կարծում է, որ այս ամենից հետևություններ լինելու են, որը կարճաժամկետ չի երևալու։
«Այնպես չէ, որ գալու են փայտերը ձեռքներին, ասեն՝ ինչո՞ւ չեք կատարում։ Միանշանակ հետևություններ լինելու են, իսկ սա նշանակում է, որ հետագայում վարկի, ներդրումների հետ կապված խնդիրներ են լինելու։ Մի պահ պատկերացրեք, որ կա ինչ-որ ներդրող, որը հետաքրքրվում է Հայաստանում ներդրում անելով ու տեսնում է այս վիճակը։ Այսինքն՝ հերիք չէ, որ ուզում են ամենամեծ ներդրումներից մեկը խլել, ապօրինի կալանավորում են իրականացնում և այլն, մի հատ էլ չեն կատարում արբիտրաժի որոշումը»,- ընդգծեց Դավիթ Ղազինյանը։
Մանրամասները՝ 168.am-ի տեսանյութում
