Գործարարներից որևէ մեկն այդ մասին ծպտուն չի հանում. չեն ցանկանում աչքի ընկնել. Հայկ Ֆարմանյան

Տնտեսագետ Հայկ Ֆարմանյանը վստահեցնում է՝ Հայաստանից Վրաստանով ապրանք արտահանող հայ տնտեսվարողներն ամեն օր Վրաստանի սահմանին հանդիպում են խոչընդոտների։

Ըստ նրա՝ խոչընդոտները միայն Հայաստանից արտահանվող ծաղկին կամ կոնյակին չեն վերաբերում. ապրանքի տեսակը, այս դեպքում, կապ չունի։

Խոսելով Վերին Լարսում հայ տնտեսվարողներին հանդիպող խնդիրների մասին, 168.am-ի հետ զրույցում նա ասաց.

«Օրինակ, Էկոնոմիկայի նախարարը գրառում է կատարում սոցցանցի իր էջում, թե Լարսով անցել է կոնյակով բեռնված 26 մեքենա. բայց դա իրենց շնորհիվ չէ, դա կապ չունի Կառավարության գործադրած ջանքերի հետ։ Գործարարները բացառապես սեփական ջանքերով են այդ խոչընդոտները լուծում։ Միաժամանակ տարօրինակ է նաև, որ գործարարներից որևէ մեկն այդ մասին ծպտուն չի հանում։ Կարծում եմ՝ գործարար հոգեբանություն է՝ չեն ցանկանում աչքի ընկնել։ Փաստն այն է, սակայն, որ Վրաստանի հետ սահմանին առկա խնդիրները մինչև հիմա չեն վերացել»։

Նրա դիտարկմամբ՝ Հայաստանից արտահանվող ապրանքների համար ստեղծված խոչընդոտների պատճառը քաղաքական է, որովհետև ՀՀ իշխանությունը պաշտպանել է Վրաստանի ներկայիս իշխանության դեմ բողոքի ակցիաներ արած հակառուս ընդդիմադիրներին։

«Վրացական կողմից վստահեցնում են՝ խնդիրն առաջացել է նրանից, որ ՀՀ իշխանությունը պաշտպանել է Վրաստանի իշխանության դեմ բողոքի ակցիա արած ուժերին։ Հիմա պետք է հասկանալ, թե ինչ պետք է անել այդ խնդիրը լուծելու համար՝ անկախ դրանք ծնող պատճառներից։ Կարծում եմ՝ պետք է անձնական, դիվանագիտական ջանքեր գործադրել։ Ինքս ՊԵԿ համակարգում աշխատելու երկարամյա փորձ ունեմ, տեսել եմ, թե ինչպես են երկու երկրների մաքսային աշխատողներն անգամ անձնական մակարդակում կարողանում օրենքի սահմաններում խնդիրներ լուծել, էլ չեմ խոսում ավելի վերին օղակների մասին։ Հիմա, իմ տեղեկություններով, մեր և վրացի պաշտոնյաներն անգամ չեն ճանաչում միմյանց»,- ասաց Հայկ Ֆարմանյանը:

Մանրամասները՝ տեսանյութում։