
«Պարտված բանակցողը բանակցությունների սեղանին նոր պարտություն է բերելու. հերթական անգամ «ծեծ» է ուտելու». Թևան Պողոսյան

Օգոստոսի 8-ին՝ ուրբաթ օրը, Վաշինգտոնում ԱՄՆ նախագահ Դոնալդ Թրամփը հանդիպում կունենա Նիկոլ Փաշինյանի և Ալիևի հետ։
Ըստ ՀՀ կառավարության տարածած պաշտոնական հաղորդագրության, Փաշինյանը նախ՝ երկկողմ հանդիպում կունենա Թրամփի հետ՝ Հայաստան-ԱՄՆ ռազմավարական գործընկերությունը խորացնելու նպատակով, և եռակողմ հանդիպում՝ ԱՄՆ նախագահի և Ադրբեջանի նախագահի հետ՝ միտված տարածաշրջանում խաղաղության, բարօրության և տնտեսական համագործակցության առաջմղմանը։
Ադրբեջանական և ամերիկյան լրատվամիջոցները տարբեր տեղեկատվություն են հաղորդում այդ հանդիպման վերաբերյալ։ Ադրբեջանական Minval կայքի տվյալներով՝ «հանդիպմանն ակնկալվում է, որ Թրամփը ներկա կլինի Հայաստանի և Ադրբեջանի միջև մտադրությունների մասին հուշագրի ստորագրմանը, որը խորհրդանշում է նրանց «պարտավորությունը վերջապես խաղաղության պայմանագիր կնքելու հարցում»։
Ամերիկյան The Washington Post-ն էլ գրել էր, որ օգոստոսի 8-ին Սպիտակ տանը Հայաստանի և Ադրբեջանի ղեկավարներին հյուրընկալելիս կփորձի միջնորդել երկու երկրի միջև խաղաղության համաձայնագրի կնքմանը։
Ի՞նչ սպասել Նիկոլ Փաշինյանի ամերիկյան այցից, արդյո՞ք ԱՄՆ-ում՝ Թրամփի միջնորդությամբ կստորագրվի «Խաղաղության պայմանագիրը»։
Մարդկային զարգացման միջազգային կենտրոնի ղեկավար, քաղաքագետ Թևան Պողոսյանը խոսելով այս հարցի շուրջ, նշեց՝ այսօրվա դրությամբ որևէ կերպ չի պատկերացնում, որ Ադրբեջանը պատրաստ է գնալ որևէ խաղաղության, մինչև չհասնի իր նպատակներին, որոնց մասին Ալիևն ասել է։
«Ալիևի նպատակն է՝ Սյունիքի տալը, Սահմանադրության փոխելը, զինանշանից Արարատի հեռացումը, և այլն, այսինքն՝ Հայաստանը չպետք է գոյություն ունենա, որ այդ խաղաղությունը լինի։
Հիմա ԱՄՆ նախագահը հասկացավ, որ իր նախաձեռնություններով մեծ կոնֆլիկտները չի կարողանում միանգամից լուծել, փոքրերին է անդրադառնում, փորձում է այս մասում որևէ բան անել։ Իրանի, Իսրայելի հետ Թուրքիան այս մասերում «տաքացել» էր, հիմա ինքը մի բան պետք է անի։ Գտել են թույլ կողմ, որի վրա ճնշելով, կարող են ինչ-որ բանի հասնել»,- 168.am-ի հետ զրույցում նշեց Թևան Պողոսյանը։
Քաղաքագետը հիշեցրեց, որ կես տարուց ավելի է՝ հանրությունը լսում է, որ «Խաղաղության պայմանագրի» վերջնական տեքստը պատրաստ է, հետևաբար՝ խնդիրը ո՞րն է, որ մինչև այս պահն այն չի ստորագրվել, 6 ամիս Թրամփի այսօրվա հանդիպմանն էին սպասո՞ւմ։
«Գնում են հանդիպելու, որովհետև Թրամփին մերժել պետք չէ, նմանատիպ Քի Վեստ էլ ենք տեսել։ Այն ժամանակվա նմանությամբ Ադրբեջանը կրկին ինչ-որ բան հորինելու է։ Ալիևն ԱՄՆ-ին ծախելու բաներ ունի։ 2020 թվականի նոյեմբերի 9-ից ասում եմ՝ պարտված բանակցողը բանակցությունների սեղանին նոր պարտություն է բերելու։ Հիմա գնում է այնտեղ՝ բանակցի, որ ի՞նչ անի, եթե պարտված չլիներ, այլ հաղթանակած, այսօր բոլորս այդ պայմանագրի տեքստը կիմանայինք։
Թրամփը բիզնեսմեն է և գիտի՝ եթե կա թույլ կողմ, թույլ կողմին ճնշելով՝ իր ուզածը պոկում է։ Ոչ մի բիզնեսմեն նեղություն չի քաշում՝ մեծ ջանքեր գործադրի արդյունքի հասնելու համար, միշտ հաշվարկում է ամենամատչելի տարբերակը։ Այս դեպքում ամենամատչելի տարբերակն է՝ ճնշում գործադրի պարտվող կողմին, մի բան պոկի»,- շեշտեց Թևան Պողոսյանը։
Նա նաև վստահեցնում է՝ Ալիևի համար Թրամփի հետ բանակցելը լինելու է «ինչ-որ բաներ նրան տալը», դրա համար էլ գնում է հանդիպման, իսկ Նիկոլ Փաշինյանն ու Ալիևը վերջին անգամ Աբու Դաբիում էլ են հանդիպել, դրանից հետո կա՞ որևէ դրական բան՝ չկա՛։
«Ի՞նչ իմանամ, գուցե Ալիևն ասել է, որ Թրամփն իրեն ընդունի Սպիտակ տանը, որ ասի՝ «Սպիտակ տուն գնացած տղա եմ»։ Մենք ենք, որ ինչ դուռը թակում ենք, բացում՝ հերթական պարտությունը մեր ազգի վզից կախում ու ուղարկում են։ Թրամփն Ուկրաինայի նախագահին էլ է այնտեղ ընդունել, մյուսներին էլ է ընդունել, մի տեղ ստացվել է, մի տեղում չի ստացվել, իր համար հեթական քայլն է՝ ցույց տալու, թե՝ «Ռուսաստան, եթե դու որևէ բան չանես, մենք այստեղ կարող ենք ինչ-որ բաների հասնել»։
Թրամփը Հայաստանի ու Ադրբեջանի համար չի խաղում, այլ այս խաղի մեջ շատ ավելի մեծ խաղ է դիտարկում, ամեն ինչ մանրուքների մեջ է։ Կրկնում եմ՝ այս ամենի մեջ որևէ դրական բան մի սպասեք, որովհետև բանակցությունների սեղանի շուրջ պարտվածը հերթական անգամ «ծեծ» է ուտելու»,- ասաց մեր զրուցակիցը։
Հիշեցնենք, որ Փաշինյան-Ալիև վերջին հանդիպումը տեղի է ունեցել հուլիսի 10-ին՝ Աբու Դաբի քաղաքում, այն տևել էր մոտավորապես 5 ժամ։