Ռուբեն Հայրապետյանի ներկայացուցիչը միջնորդեց անցկացնել արագացված դատաքննություն, դատախազը պնդում է՝ վարույթը պետք է շարունակվի

Հակակոռուպցիոն դատարանում, դատավոր Կարապետ Բադալյանի նախագահությամբ, այսօր շարունակվեց ՀՖՖ նախկին նախագահ, ԱԺ նախկին պատգամավոր Ռուբեն Հայրապետյանի և նրա ընտանիքի անդամների՝ ենթադրյալ ապօրինի գույքի բռնագանձման պահանջով գործով հերթական դատական նիստը:

Նախորդ դատական նիստը տեղի չունեցավ. Դատախազության ներկայացուցիչը գործուղման էր մեկնել: Ներկայացել էր այլ դատախազ, որն էլ միջնորդել էր հետաձգել նիստը, ինչը և դատավոր Բադալյանը բավարարել էր:

Այսօրվա դատական նիստի սկզբում մեղադրող դատախազը կրկին հայտարարություն ուներ՝ պայմանավորված Սահմանադրական դատարանի որոշմամբ:

«Հավանաբար ամբողջական վերահաշվարկի անհրաժեշտություն կլինի»,- ասաց նա:

Կարդացեք նաև

Ռուբեն Հայրապետյանի ներկայացուցիչ Վահագն Դալլաքյանն էլ միջնորդեց արագացված դատաքննություն անցկացնել ու մերժել դատախազության հայցը:

«ՍԴ որոշման կոնտեքստում հայցն ակնհայտորեն ոչ իրավաչափ է»,- ասաց փաստաբանը:

 

Ի պատասխան՝ դատախազը նշեց՝ սույն գործի քննությունը ենթակա է շարունակման, քանի որ Ռուբեն Հայրապետյանը 1996թ.-ից եղել է Ավանի թաղապետ, հետևաբար՝ պաշտոնատար անձ:

«Այս դիրքորոշումը չի բխում ՍԴ որոշման տրամաբանությունից: Այս գործով ուսումնասիրությունը չի սկսվել այլ հիմքով, այլ կոնկրետ հանցանքի հիմքով»,- ասաց Վահագն Դալլաքյանը:

Դատավոր Կարապետ Բադալյանն ավարտված համարեց արագացված դատաքննության միջնորդությունը, ասաց, որ որոշումն առանձին կուղարկվի կողմերին, ու փակեց նիստը:

Հիշեցնենք, դատախազությունը պահանջում է Ռուբեն Հայրապետյանից և Նարինե Հայրապետյանից՝ հօգուտ ՀՀ-ի, որպես ապօրինի ծագում ունեցող գույք՝ բռնագանձել ՝ Կոտայքի մարզի Ծաղկաձորում գտնվող հողամասն ամբողջությամբ, Առինջում գտնվող անշարժ գույքն ամբողջությամբ, Սևանում գտնվող հողամասն ամբողջությամբ, ինչպես նաև՝ «Լեքսուս» ավտոմեքենան, իսկ անհնարինության դեպքում՝ գույքերի միջին շուկայական արժեքը։

Բացի այդ, դատախազությունը պահանջում է Ռաֆիկ և Մարիամ Հայրապետյաններից բռնագանձել ավտոմեքենան, «Զարգացման հայկական բանկ» ՓԲԸ-ում 2021թ. հոկտեմբերին ներդրված 6 մլն 897 հազ․ 30 ՀՀ դրամ չափով արժույթն ամբողջությամբ, նույն ՓԲԸ-ում 2020թ. սեպտեմբերի 25-ին ներդրված և 2021թ. սեպտեմբերի 22-ին ներդրված 6674 ԱՄՆ դոլարի չափով ավանդն ամբողջությամբ, ինչպես նաև՝ Յունիբանկում 2021թ. սեպտեմբերի 22-ին ներդրված 1 մլն 523 հազ․ 641 ՀՀ դրամի չափով ավանդն ամբողջությամբ։

Այնուհետև, ըստ դատախազի, Ռաֆիկ Հայրապետյանից, որպես ապօրինի ծագում ունեցող գույք՝ բռնագանձման է ենթակա Երևանի Ավան թաղամասի շենքերից մեկում ոչ բնակելի տարածքն ամբողջությամբ, Ավանում բնակելի տունն ամբողջությամբ, Լեքսուս մակնիշի ավտոմեքենան, ինչպես նաև՝ «Սպորտ Ռեզորթ», «Ռոյալ Քլաբ», «Սևան Ռեզորթ», «Հարսնաքար», «Նորալուսին» ընկերությունների մասնակցությունն ամբողջությամբ, իսկ անհնարինության դեպքում՝ միջին արժեքը։

Բացի այդ, դատախազությունը պահանջում է բռնագանձել նաև «Զարգացման հայկական բանկ» ՓԲԸ 65181 բաժնետոմսերից 8526 ապօրինի բաժնետոմսերը և 153433 հասարակ բաժնետոմսերից 45430 ապօրինի բաժնետոմսերը, այնուհետև, «Հարսնաքար» ՍՊԸ-ին տրամադրված փոխառության 70 մլն 600.496 ՀՀ դրամ չվերադարձված մասից 57 մլն 58.104 ՀՀ դրամի պահանջի իրավունքը, «Նորալուսին» ընկերությանը տրամադրված փոխառության 43 մլն 710.903 ՀՀ դրամ չվերադարձված մասից՝ 5 մլն 898.520 ՀՀ դրամի պահանջի իրավունքը, «Ռոյալ Քլաբ» ՍՊԸ-ին տրամադրված փոխառության 3 մլն 394.375 ՀՀ դրամ չվերադարձված մասից՝ 96.375 ՀՀ դրամի պահանջի իրավունքը, «Սևան Ռեզորթ» ՍՊԸ-ին տրամադրված փոխառության 88 մլն 318.393 ՀՀ դրամ չվերադարձված մասից՝ 74 մլն 119.266 դրամի պահանջի իրավունքը, «Բյուրեղ» ՓԲԸ-ին տրամադրված փոխառության 97 մլն 702.500 դրամ չվերադարձված մասից՝ 83 մլն 568 հազ. 580 դրամի պահանջի իրավունքը, «Արագած» ԲԿ-ին տրամադրված փոխառության 199 մլն 74.606 չվերադարձված մասից՝ 193 մլն 829.510 ՀՀ դրամի պահանջի իրավունքը, իսկ անհնարինության դեպքում՝ չվերադարձված ապօրինի մասի չափի գումար։ Դատախազությունը նաև պահանջում է բռնագանձել բաժնետոմսեր։

Մանրամասները՝ տեսանյութում:

Տեսանյութեր

Լրահոս