Կալասը Թրամփի կողմից ՌԴ-ին տրված 50 օր վերջնաժամկետը շատ երկար է համարում
Եվրոպական դիվանագիտության ղեկավար Կայա Կալասը համարում է, որ Ուկրաինայում խաղաղության հասնելու համար ԱՄՆ նախագահ Դոնալդ Թրամփի կողմից ՌԴ նախագահ Վլադիմիր Պուտինին տրված 50-օրյա ժամկետը չափազանց երկար է։ Այս մասին հաղորդում է Deutsche Welle-ն։
«Այն, որ նախագահ Թրամփը կոշտ դիրքորոշում է ընդունել Ռուսաստանի նկատմամբ, շատ դրական նշան է։ Մյուս կողմից, 50 օրը շատ երկար ժամանակ է, եթե մենք տեսնում ենք, թե ինչպես են նրանք ամեն օր սպանում անմեղ քաղաքացիների», – ասել է Կալասը։
«Մենք բոլորս պետք է մեծացնենք Ռուսաստանի վրա ճնշումը, որպեսզի նա նույնպես ցանկանա խաղաղություն», – հավելել է ԵՄ արտաքին գործերի և անվտանգության քաղաքականության հարցերով բարձր ներկայացուցիչը։
Կալասը հույս է հայտնել, որ ԱՄՆ-ն «նույնպես ռազմական օգնություն կցուցաբերի, ինչպես եվրոպացիները»։Հուլիսի 14-ին Սպիտակ տանը ՆԱՏՕ-ի գլխավոր քարտուղար Մարկ Ռյուտեի հետ հանդիպման ժամանակ Դոնալդ Թրամփը հայտարարել է, որ Ռուսաստանի ղեկավարությանը 50 օր է տալիս Ուկրաինայի հետ խաղաղության համաձայնագրի հասնելու համար։ Հակառակ դեպքում, ԱՄՆ նախագահը սպառնացել է Ռուսաստանի առևտրային գործընկերների նկատմամբ 100%-ի չափով երկրորդային մաքսատուրքեր կիրառել։
Թրամփը նաև հաստատել է ՆԱՏՕ-ի միջոցով Ուկրաինա Patriot հակաօդային պաշտպանության համակարգեր ուղարկելու ծրագրերը։
«Ես շնորհակալ եմ նախագահ Թրամփին մեր ժողովրդի կյանքը պաշտպանելու պատրաստակամության համար», – հուլիսի 14-ի երեկոյան հայտարարել է Ուկրաինայի նախագահ Վոլոդիմիր Զելենսկին։
ՌԴ պետդումայի միջազգային հարցերով հանձնաժողովի ղեկավար Լեոնիդ Սլուցկին, արձագանքելով Թրամփի հայտարարությանը, ՏԱՍՍ-ին ասել է, որ Մոսկվայի բոլոր առաջարկները «բանակցությունների սեղանին են»։ Նրա խոսքով՝ ռուսական կողմը սպասում է, որ Կիևը համաձայնության գա Ստամբուլում ուղիղ բանակցությունների երրորդ փուլի ժամկետի վերաբերյալ։
