Իրանը չի շտապում իր միջուկային ծրագրի շուրջ չկշռադատված բանակցություններ սկսել. Աբաս Արաղչի
Իրանը չի շտապում իր միջուկային ծրագրի շուրջ չկշռադատված բանակցություններ սկսել, հայտարարել է Իրանի արտաքին գործերի նախարար Աբաս Արաղչին։
Շաբաթ օրը Թեհրանում օտարերկրյա դեսպանների հետ հանդիպման շրջանակում լրագրողների հետ զրույցում Արաղչին ասել է, որ Իրանը գնահատում է ցանկացած ապագա բանակցությունների ժամանակը, վայրը, ձևաչափը և պայմանավորվածությունները, ինչպես նաև անհրաժեշտ երաշխիքները։
Թեև Իրանը չի շտապում անխոհեմ բանակցությունների մեջ մտնել, այն բաց չի թողնի իրանական ազգի շահերի իրացման և ոչ մի հնարավորություն, հավելել է երկրի արտգործնախարարը։
«Մենք մանրակրկիտ գնահատում ենք պայմաններն ու բոլոր ասպեկտները։ Ցանկացած ժամանակ և ցանկացած վայրում կձեռնարկենք անհրաժեշտ միջոցներ, որոնք կապահովեն իրանցի ժողովրդի շահերը», – ասել է նա։
Արաղչին ընդգծել է, որ դիվանագիտության դռները երբեք չեն փակվում։
«Ցանկացած հանգամանքներում հնարավոր է դիվանագիտություն դրսևորել և դրա օգնությամբ հասնել նպատակների։ Սակայն մենք մեր աշխատանքը կատարում ենք զգուշորեն և վստահ լինելով մեր ուժերին», – հավելել է նա։
Ավելի վաղ Իրանի գերագույն առաջնորդի ավագ խորհրդական Ալի Լարիջանին հաստատել էր միջուկային ծրագրի շուրջ բանակցությունները վերսկսելու վերաբերյալ ԱՄՆ-ից հաղորդագրություններ ստանալու փաստը՝ հայտարարելով, որ Թեհրանն ուսումնասիրում է դրանք։
