Նեթանյահուն Թրամփի հետ քննարկել է պատանդների ազատ արձակումը և Իրանի նկատմամբ «մեծ հաղթանակը»
Իսրայելի վարչապետ Բենիամին Նեթանյահուն ԱՄՆ նախագահ Դոնալդ Թրամփի հետ հանդիպումից հետո հայտարարել է, որ իրենք քննարկել են Գազայի հատվածում պահվող պատանդներին ազատ արձակելու ջանքերը։
Այս մասին Նեթանյահուն հայտարարել է X-ի միկրոբլոգի եթերում։
«Այսօր ես Սպիտակ տանը ևս մեկ հանդիպում ունեցա նախագահ Թրամփի հետ, ապա կարճատև հանդիպում փոխնախագահ Վենսի հետ։ Մենք կենտրոնացել ենք մեր պատանդներին ազատ արձակելու ջանքերի վրա։ Մենք մի պահ անգամ չենք հանձնվում, և դա հնարավոր է դարձել մեր հերոս զինվորների կողմից գործադրվող ռազմական ճնշման շնորհիվ։
Ցավոք, այս ջանքերը մեզանից պահանջում են ցավոտ գին՝ մեր լավագույն որդիների կորուստ», – նշել է Նեթանյահուն։
Նա հավելել է, որ Իսրայելը վճռական է հասնել բոլոր նպատակներին, այդ թվում՝ «ազատ արձակել բոլոր պատանդներին՝ թե՛ ողջ, թե՛ մահացած, վերացնել ՀԱՄԱՍ-ի ռազմական և կառավարական կարողությունները և այդպիսով ապահովել, որ Գազան այլևս սպառնալիք չներկայացնի Իսրայելի համար»։
Նեթանյահուն X-ի եթերում հայտնել է, որ Թրամփի հետ քննարկել են նաև Իրանի նկատմամբ տարած «մեծ հաղթանակը»։«Մենք նաև քննարկել ենք Իրանի նկատմամբ մեր տարած մեծ հաղթանակի հետևանքներն ու հնարավորությունները։
Այստեղ հնարավորություններ են բացվում խաղաղության շրջանակն ընդլայնելու, Աբրահամի համաձայնագրերն ընդլայնելու համար։ Մենք այս ուղղությամբ աշխատում ենք ամբողջ եռանդով», – ընդգծել է Նեթանյահուն։
Վերջում նա երախտագիտություն է հայտնել նախագահ Թրամփին ցուցաբերած աջակցության, ձեռնարկած վճռական գործողությունների և այսօր Մերձավոր Արևելքի և Իսրայելի Պետության համար մեծ ապագա կերտելու համատեղ ջանքերի համար։
Նեթանյահուն հուլիսի 8-ին հանդիպել է նաև փոխնախագահ Ջեյ Դի Վենսի հետ, ապա այցելել ԱՄՆ Կապիտոլիում, իսկ հուլիսի 9-ին կվերադառնա Կոնգրես՝ ԱՄՆ Սենատի ղեկավարների հետ հանդիպելու նպատակով։
