Թուրքիան գոհունակություն է հայտնել Բաքու-Երևան խաղաղության պայմանագրի նախագծից
Մայիսի 22-ին Թուրքիայի նախագահ Ռեջեփ Թայիփ Էրդողանի գլխավորությամբ տեղի է ունեցել ազգային անվտանգության խորհրդի նիստ։ Այս մասին տեղեկացնում է ermenihaber.am-ը։
Թուրքիայի նախագահի աշխատակազմի հանրային կապերի վարչությունը հայտարարություն է տարածել՝ ներկայացնելով նիստի ընթացքում քննարկված հարցերը, որոնք վերաբերել են Սիրիայում զարգացումներին, ռուս-ուկրաինական հակամարտությանը, Գազայի խնդրին և Թուրքիայի կողմից ահաբեկչական որակվող «Քուրդիստանի բանվորական կուսակցությանը» (ՔԲԿ-PKK), ինչպես նաև Ադրբեջան-Հայաստան հարաբերություններին։
Մասնավորապես` Թուրքիան գոհունակություն է հայտնել առ այն, որ Ադրբեջանը և Հայաստանը համաձայնություն են ձեռք բերել խաղաղության պայմանագրի նախագծի շուրջ։
Եվս մեկ անգամ վերահաստատվել է Թուրքիայի ակնկալիքը՝ ապահովել անհրաժեշտ պայմանները վերջնական խաղաղության հաստատման համար, որը կծառայի տարածաշրջանի բոլոր դերակատարների շահերին։
