««Եռաբլուրի» գործով ՔԿ-ում դեմ են առել որոշման կայացման փուլին». Վահան Հովհաննիսյան
2022 թվականի սեպտեմբերի 21-ին «Եռաբլուրում» տեղի ունեցած՝ զոհված զինծառայողների նկատմամբ կարմիր բերետավորների կիրառած բռնության վերաբերյալ գործում, որն այս պահին գտնվում է Քննչականում, տեղաշարժ չկա։ Այս մասին 168.am-ի հետ զրույցում նշեց փաստաբան Վահան Հովհաննիսյանը։
«Ամեն դեպքում մեր մասով քննչական գործողություններ չեն իրականացվում, որևէ գործողության չենք մասնակցում ու որևէ բանի մասով չենք ծանուցվում։ Գուցե իրենք այլ գործողություններ անում են, բայց մեր մասով այս պահին ոչինչ չկա։
Այսպես ասեմ՝ մեզ հետ կապված գործողություն էլ չկար անելու, որովհետև այն, ինչ պետք էր անել՝ արվել էր։ Առերեսում եղել էր, փորձաքննություն, տուժողները ճանաչվել են»,- նշեց Վահան Հովհաննիսյանը։
Փաստաբանի խոսքով՝ ըստ էության գործով ոչինչ չկա անելու՝ դատարանի որոշմամբ, միակ դատավարական ելքը, որը կարող է լինել՝ արդեն անձանց արարքներին քրեաիրավական գնահատական տալն էր։
«Իրենք դեմ են առել որոշման կայացման փուլին, պետք է արդեն սպասենք որոշումների, ինչը տևական ժամանակ է՝ չկա։ Այս ամենը տարօրինակ չէ, քանի որ այսօր այդ ո՞ր ոստիկանի նկատմամբ է քրեական հետապնդում իրականացվում, անգամ ակնհայտ փաստերի դեպքում։ Այնպես որ, սա ինձ համար տարօրինակ չէ, սովորական գործելաոճ է»,- շեշտեց Վահան Հովհաննիսյանը։
Նա նաև ընդգծեց՝ երբ դատարանները գործը կարճելու վերաբերյալ բավարարել էին իրենց բողոքները, իսկ դատախազության բողոքները մերժել, դրանից հետո գործը կրկին ուղարկվել է լրացուցիչ քննության և այս պահին գտնվում է ՔԿ-ի Հատկապես կարևոր գործերով վարչությունում։
Հիշեցնենք, որ 2022 թվականի սեպտեմբերի 21-ին՝ ՀՀ անկախության օրը, 44-օրյա պատերազմում զոհված տղաների ծնողները գնացել էին «Եռաբլուր»՝ հայտարարելով, որ թույլ չեն տալու Նիկոլ Փաշինյանը մտնի այնտեղ և ծաղիկներ դնի իրենց որդիների շիրիմներին։
Սակայն Նիկոլ Փաշինյանն անվտանգության մի քանի տասնյակ աշխատակիցներով, կարմիր բերետավորներով շրջապատված՝ գնաց «Եռաբլուր»։ Կարմիր բերետավորները սկսեցին բռնի ուժ գործադրել ու բերման ենթարկել որդեկորույս ծնողներին ու ապահովել Նիկոլ Փաշինյանը մուտքը «Եռաբլուր»։
