«Փաշինյանը ոչ ոք է. ՀՀ ժողովուրդը նրան ղարաբաղյան շարժումը չշարունակելու մանդատ չի տվել». Մենուա Սողոմոնյան
«ՀայաՔվե» ազգային քաղաքացիական միավորումն այս պահին 186 հավատարմագրած դիտորդ ունի Գյումրի և Փարաքար համայնքներում ընտրական գործընթացները դիտարկելու համար: Այս մասին 168TV-ի «Ռեվյու» հաղորդման ընթացքում ասաց միավորման անդամ Մենուա Սողոմոնյանը:
Նա նշեց, որ այս օրերին արձանագրվում են բազմաթիվ խնդիրներ, որոնք միտված են ազդելու ընտրական գործընթացների վրա.
«Խախտումը միայն քվեատուփ գողանալը կամ լցոնելը չէ, այսօր տեղի են ունենում ճնշումներ՝ բարձրաստիճան պաշտոնատար անձանց խոսույթի միջոցով, մարդկանց պատեպատ խփելու, ֆիզիկական հաշվեհարդար տեսնելու իմաստով, և նաև իրավապահ համակարգն է ծառայեցվում տարբեր թեկնածուների քարոզարշավը խոչընդոտելու նպատակով»,- ընդգծեց նա:
Անդրադառնալով Արցախի վերաբերյալ Փաշինյանի հայտարարություններին և խորհրդարանում ոչ ադեկվատ պահվածքին, Մենուա Սողոմոնյանը հետևյալն ասաց. «Նիկոլ Փաշինյանը ոչ ոք է, որպեսզի ՀՀ անունից արցախյան շարժումը չշարունակելու մասին հայտարարությամբ հանդես գա: Նա չէ, որ պետք է զբաղվի Արցախյան շարժումով: Նրան պետք է հեռացնել: Երբ նա ասում է, թե դա ՀՀ պաշտոնական դիրքորոշումն է, ո՛չ, դա ՀՀ պաշտոնական դիրքորոշումը չէ, ՀՀ ժողովուրդը Փաշինյանին նման մանդատ չի տվել՝ ղարաբաղյան շարժումը չշարունակելու մանդատ չի տվել»:
Մանրամասները՝ 168TV-ի տեսանյութում
