Միհրդատ Մադաթյան, իսկ ինչու Ռոբերտ Քոչարյանին նույն հետևողականությամբ այդ հարցերը չեք ուղղում. Հենրիխ Դանիելյան
ՀՀԿ Երիտասարդական կառույցի ղեկավար Հենրիխ Դանիելյանը ֆեյսբուքյան իր էջում գրում է.
«Միհրդատ Մադաթյանը, ներկայանալով որպես Ռոբերտ Քոչարյանի թիմակից, շարունակաբար հարցադրումներ է հնչեցնում 2018 թվականի իրադարձությունների վերաբերյալ։ Սակայն հետաքրքիր զուգադիպությամբ այդ հարցերն ուղղվում են ոչ թե երկրորդ, այլ երրորդ նախագահ Սերժ Սարգսյանին։
Տրամաբանական հարց է առաջանում՝ ինչո՞ւ նման հետևողականությամբ հարցեր չեն ուղղվում հենց Ռոբերտ Քոչարյանին։ Մասնավորապես՝ ինչ դիրքորոշում ուներ նա 2018-ի գործընթացների նկատմամբ։ Աջակցու՞մ էր այդ շարժմանը, թե՞ ոչ։ Սատարու՞մ էր Սերժ Սարգսյանին՝ իշխանությունը պահպանելու հարցում, նախընտրու՞մ էր չմիջամտել, թե՞ ուղղակի կամ անուղղակի սատարում էր Փաշինյանին՝ խրախուսելով Սերժ Սարգսյանի դեմ իրականացվող «մերժման օպերացիան»։
Երբ հանդես ես գալիս որպես որևէ մեկի գաղափարակից կամ թիմակից, ապա նախ և առաջ հարցադրումներ պետք է ուղղես հենց նրան։
Իսկ մենք՝ մոտ ապագայում, փաստերի հիման վրա կհրապարակենք տեղեկատվություն, որի արդյունքում մեր հայրենակիցները կստանան սպառիչ պատասխաններ վերոնշյալ բոլոր հարցերի վերաբերյալ»:
