Ուշադիր հետևում ենք Սիրիայում տեղի ունեցող իրադարձություններին, մշտական կապի մեջ ենք Դամասկոսի հետ. Կրեմլ
Կրեմլն ուշադիր հետևում է Սիրիայում տեղի ունեցող իրադարձություններին և մշտական երկխոսության մեջ է սիրիացի ընկերների հետ։ Այս մասին, ՏԱՍՍ-ի փոխանցմամբ, հայտարարել է ՌԴ նախագահի մամուլի քարտուղար Դմիտրի Պեսկովը։
«Այս պահին մենք շատ ուշադիր հետևում ենք, թե ինչ է կատարվում Սիրիայում, մենք մշտական երկխոսության մեջ ենք մեր սիրիացի ընկերների հետ: Կախված իրավիճակի գնահատականից՝ հնարավոր կլինի խոսել օգնության աստիճանի մասին, որն անհրաժեշտ է սիրիական իշխանություններին գրոհայիններին դիմակայելու և այդ սպառնալիքը վերացնելու համար»,- ասել է Պեսկովը։
Նոյեմբերի 27-ի առավոտյան «Ջաբհաթ ան Նուսրա» ահաբեկչական խմբավորման կազմավորումները լայնածավալ հարձակում են իրականացրել Սիրիայի հյուսիսում։ Զինված ուժերի հրամանատարության հայտարարության համաձայն՝ ահաբեկիչները փորձել են գրոհել սիրիական բանակի պաշտպանության տակ գտնվող ռազմական օբյեկտները, գյուղերն ու քաղաքները։ Բանակը սկսել է հետ մղել հարձակումը։
Նոյեմբերի 30-ին Զինված ուժերի հրամանատարությունը տեղեկացրել է լ Հալեպ քաղաքի բազմաթիվ թաղամասեր ներթափանցած ահաբեկիչների դիրքերի վրա հարձակումների մասին։ Սիրիական բանակը ստիպված է եղել վերախմբավորել իր ուժերը՝ խաղաղ բնակիչների ու զինվորականների կյանքը փրկելու և հակահարձակման նախապատրաստվելու համար։
