Սի Ծինփինը հայտարարել է, որ Չինաստանը կհամագործակցի բոլոր երկրների հետ
Չինաստանը կհամագործակցի բոլոր երկրների հետ բազմաբևեռ աշխարհի կառուցման և բոլորի համար շահավետ տնտեսական գլոբալացման համար։ Ինչպես տեղեկանում ենք ՏԱՍՍ գործակալությունից, այդ մասին հայտարարել է Չինաստանի նախագահ Սի Ծինփինը, որը գտնվում է Բրազիլիայում՝ Մեծ քսանյակի (G20) գագաթնաժողովին։
«Չինաստանը պատրաստ է համագործակցել բոլոր կողմերի հետ՝ հանուն իրավահավասար և կանոնավոր բազմաբևեռ աշխարհի ստեղծման և համընդհանուր շահավետ և ներառական տնտեսական գլոբալացման», – ասված է Չինաստանի նախագահի գրավոր հայտարարության մեջ, որը տարածվել է G20-ի գագաթնաժողովին նրա ժամանման առթիվ։
Սի Ծինփինը նաև G20-ի՝ որպես միջազգային տնտեսական համագործակցության կարևոր հարթակի դերի բարձրացման հույս է հայտնել։
«Արդարացի աշխարհի կառուցումը G20-ից պահանջում է փոխադարձ հարգանքի, իրավահավասար համագործակցության և փոխշահավետության սկզբունքների պահպանում, ինչպես նաև գլոբալ Հարավի երկրներին աջակցություն՝ ավելի մեծ զարգացման հասնելու համար», – ասել է Սի Ծինփինը բրազիլական Folha de S. Paulo թերթում հրապարակված հոդվածում:
G20-ի գագաթնաժողովն անցկացվում է Ռիո դե Ժանեյրոյում նոյեմբերի 18-ից 19-ը:
