Հույն հայտնի երգչուհին հրաժարվել է Իզմիրում ելույթ ունենալ Աթաթուրքի դիմանկարի ֆոնին
Հույն հայտնի երգչուհի Դեսպինա Վանդին չեղյալ է հայտարարել Թուրքական կրթական հիմնադրամի համերգում իր ելույթը: Greek Reporter-ի փոխանցմամբ՝ երգչուհին նման որոշում է կայացրել՝ իմանալով, որ բեմում տեղադրված է Քեմալ Աթաթուրքի դիմանկարով պաստառը, որի մասին համերգի կազմակերպիչները տեղյակ չէին պահել իրեն: Երգչուհու գնահատմամբ՝ դրանով փորձ է արվել աղավաղել համերգի էությունը՝ հաղորդելով քաղաքական երանգ։
Նշենք, որ համերգը տեղի է ունեցել Իզմիր նահանգի Չեշմե քաղաքում․ Վանդին, երգչախմբի հետ միասին, պատրաստվում էր կատարել Իզմիրի քաղաքային հիմնը:
«Ամենայն հարգանքով հանդիսատեսի նկատմամբ, որ իր ներկայությամբ պատվել է ելույթս, հայտարարում եմ, որ իմ մասնակցությունը համերգին անհնար է բացառապես Թուրքական կրթական հիմնադրամի մեղքով, որը միակողմանի և առանց նախազգուշացման որոշել է աղավաղել համերգի էությունը՝ դրան հաղորդելով քաղաքական երանգ»,- Instagram-ի իր էջում բեմ դուրս չգալու որոշումը պարզաբանել է Վանդին:
Չեշմեի վարչակազմի ղեկավար Լալ Դենիզլին փորձել է իրավիճակից դուրս գալ՝ բեմ բարձրանալով և հանդիսատեսին կոչ անելով երգչուհուն սուլելու համար ուժեր չվատնել։
Նա հավելել է, որ թուրք ազգը բազմաթիվ նահատակներ է տվել այդ հողը նվաճելու համար։
Թուրքական մամուլն արձագանքել է այս միջադեպին։ Օրինակ, Hurriyet թերթը գրել է, որ Վանդին «ծայրահեղ միջադեպ» է թույլ տվել։
