Ալմա Աթիի հռչակագրում չկա որեւէ խոսք «ԽՍՀՄ ներքին վարչական սահմանների» մասին. Հակոբ Բադալյան
Հակոբ Բադալյանը գրում է. «Ալմա Աթիի հռչակագրում չկա որևէ խոսք «ԽՍՀՄ ներքին վարչական սահմանների» մասին, ինչպես օգտագործում եմ հռչակագրի «փրկիչ» բնույթի մասին ազդարարող շատ հայրենակիցներ:
Ալմա Աթիի հռչակագրում խոսքը «գոյություն ունեցող սահմանների անխախտելիության» մասին է: Թվում է, թե ի՞նչ տարբերություն, չէ՞ որ այդ ժամանակ գոյություն ունեցողը ԽՍՀՄ այսպես ասած ներքին սահմաններն էին: Այդպես է առերեւույթ: Բայց, կա առանցքային հարցը՝ իսկ ընդհանրապես ինչպե՞ս են ձեւավորված եղել գոյություն ունեցող սահմանները, իրավական, օրինական ի՞նչ հիմքով, ի՞նչ սկզբունքներով:
Որովհետև, նույն այդ Ալմա Աթիի հռչակագրով՝ եթե դա որեւէ մեկն ընդունում է իբրև «սահմանազատման Ավետարան», սահմանված են մի շարք սկզբունքներ՝ որպես հարաբերությունների հիմք: Դրանց թվում է օրինակ ուժի կիրառման կամ ուժի կկիրառման սպառնալիքի բացառումը:
Կա՞ ավելորդ մեկնաբանության կարիք, թե Ադրբեջանը քանի անգամ է խախտել այդ սկզբունքները: Դա խոստովանել է նույնիսկ պաշտոնական Երևանը, որովհետեւ, եթե հայտարարում են՝ Նիկոլ Փաշինյանը կամ այլ բարձրաստիճան պաշտոնյաներ, որ՝ չանելու դեպքում Ադրբեջանը կանի պատերազմ, դա ուղիղ խոստովանություն է, որ Բաքուն խախտում է հռչակագիրը՝ որովհետև խոսում է ուժի կիրառման սպառնալիքով:
Ստացվում է, որ Ալմա Աթիի հռչակագիրը ինչ-որ գործընթացի հիմք է հռչակվում՝ այդ հռչակագիրը խախտելով: Սա հնարավոր կլիներ համարել զավեշտ կամ անհեթեթություն, եթե խոսքը չվերաբերեր Հայաստանի ճակատագրին եւ դրա հետ խաղերին»:
