Ֆինլանդիայում նախագահական ընտրություններ են
Ֆինլանդիայում սկսվել են նախագահական ընտրությունները. երկրի քաղաքացիները կընտրեն պետության 13-րդ ղեկավարին, հաղորդում են տեղական ԶԼՄ-ները։
Ընտրելու իրավունք ունի մոտ 4,55 մլն քաղաքացի (երկրի բնակչությունը 5,56 մլն մարդ է)։
Ընտրությունների արդյունքները հայտնի կդառնան այսօր։ Եթե թեկնածուներից մեկը հաղթի, ապա փետրվարի 1-ին տեղի կունենա նոր նախագահի երդմնակալության արարողությունը։ Եթե թեկնածուներից ոչ մեկին չհաջողվի հավաքել ձայների 50%-ից ավելին, ապա ամենաբարձր արդյունք գրանցած երկու թեկնածուները կանցնեն երկրորդ փուլ, որը կկայանա փետրվարի 11-ին։
Ֆինլանդիայում նախագահն ընտրվում է վեց տարի ժամկետով։ Ներկայիս նախագահ Սաուլի Նիինիստյոն ավարտում է իր պաշտոնավարումը որպես պետության ղեկավար՝ առավելագույնը երկու անընդմեջ ժամկետներից հետո։
Ընտրություններին մասնակցում է ինը թեկնածու։ Հաղթելու ամենամեծ շանսերն ունեն նախկին վարչապետ (2014-2015) Ալեքսանդր Ստուբը և երկրի արտգործնախարարության նախկին ղեկավար Պեկկա Հաավիստոն։ Երկու թեկնածուներն էլ աջակցում են Ուկրաինային, հանդես են գալիս ՆԱՏՕ-ի և Միացյալ Նահանգների հետ համագործակցության ընդլայնման օգտին, ինչպես նաև առաջարկում են Ռուսաստանի դեմ հետագա սահմանափակումներ:
