ԱԽՔ-ը չի հանրայնացնում «Ռասմուսեն գլոբալի» հետ համագործակցության մանրամասները. Եվրոպական հանձնաժողովը՝ չի թաքցնում
ՆԱՏՕ-ի նախկին գլխավոր քարտուղար, Ուկրաինայի նախագահի նախկին ոչ հաստիքային խորհրդական, ներկայումս՝ «Ռասմուսեն գլոբալ» խորհրդատվական միջազգային կազմակերպության հիմնադիր ղեկավար Անդերս Ֆոգ Ռասմուսենի Հայաստան այցից, այստեղ արված հայտարարություններից հետո 168.am-ը տեղեկացրել էր՝ Ռասմուսենի համար դա պարզապես աշխատանք է, որի դիմաց նա վճարվում է:
Հենց այս աշխատանքի համատեքստում պետք է դիտարկել նաև ՆԱՏՕ-ի նախկին քարտուղարի հանդիպումները Նիկոլ Փաշինյանի, ԱԽ քարտուղար Արմեն Գրիգորյանի, ՀՀ ՊՆ ղեկավար Սուրեն Պապիկյանի հետ: Ժամանակին ինքը՝ Անդերս Ֆոգ Ռասմուսենն էլ էր խոստովանել, որ Հայաստանում է ՀՀ կառավարության հրավերով, որպեսզի փորձի ամրապնդել Հայաստան-Արևմուտք հարաբերությունները:
Ի դեպ, Եվրոպական հանձնաժողովի Թափանցիկության ռեգիստրում առկա է տեղեկություն «Ռասմուսեն գլոբալ» կազմակերպության ֆինանսական տարվա մասին, որտեղ կազմակերպության հաճախորդների ցանկում ներառված է նաև Հայաստանի Հանրապետությունը:
Ըստ վերջին՝ 2024 թվականի հունվարի 4-ի թարմացման, Հայաստանի Հանրապետությունը խորհրդատվություն է ստացել ՀՀ-ԵՄ հարաբերությունների թեմատիկայով. այդ ծառայության դիմաց «Ռասմուսեն գլոբալի» եկամուտ է նախանշվել 400-499 հազար եվրո գումար:
Օրերս 168.am-ը դիմել էր Կառավարություն, հետաքրքրվելով՝
-շարունակո՞ւմ է արդյոք ՀՀ կառավարությունն օգտվել «Ռասմուսեն գլոբալ» կազմակերպության խորհրդատվությունից,
-մինչ օրս որքա՞ն գումար է փոխանցել Հայաստանի կառավարությունն այս ընկերությանը խորհրդատվության համար,
-ի՞նչ խորհուրդներ է տվել «Ռասմուսեն գլոբալը» ՀՀ կառավարությանը:
Կառավարությունից մեր գրավոր հարցումը վերահասցեագրել էին ՀՀ Անվտանգության խորհրդի քարտուղարի գրասենյակ. թերևս Հայաստանում հենց այս կառույցի հետ է ուղիղ աշխատում «Ռասմուսեն գլոբալը»:
ԱԽՔ գրասենյակից մեզ մասնավորապես հայտնել են. «Հիմք ընդունելով Տեղեկատվության ազատության մասին օրենքի 8-րդ հոդվածի 1-ին մասի 1-ին կետը՝ Ձեր կողմից հայցվող տեղեկությունը ենթակա չէ հրապարակման»:
Նկատենք՝ օրենքի այդ կետը ենթադրում է պետական, բանկային, առևտրային գաղտնիքի կամ սահմանափակ տարածման ծառայողական տեղեկության մասին դիտարկում:
