Քաղաքական կամքի դեպքում շատ մոտ ապագայում կարող ենք շոշափելի հանգրվանի հասնել խաղաղության հաստատման հարցում․ Արարատ Միրզոյան
«Հայաստանը հավատարիմ է խաղաղության գործընթացին տարածաշրջանում»,- այս մասին այսօր պաշտոնական այցով Երևան ժամանած Հունաստանի ԱԳ նախարարի հետ համատեղ ասուլիսի ընթացքում հայտարարեց ՀՀ ԱԳ նախարար Արարատ Միրզոյանը՝ անդրադառնալով հայ-հունական հարաբերություններին և ռեգիոնալ իրավիճակին։
Դիմելով իր հույն գործընկերոջը՝ Միրզոյանն ասաց, որ նրա այցը համերաշխության կարևորագույն դրսևորում է մի ժամանակաշրջանում, երբ ՀՀ-ն իսկապես զգում է այդ համերաշխության ու աջակցության կարիքը։
Միրզոյանը նշեց, որ իր գործընկերոջը ներկայացրել է Հարավային Կովկասում ստեղծված իրավիճակը ԼՂ հայության բռնի տեղահանությունից հետո, խաղաղության գործընթացը, մանրամասները, խնդիրները և «Խաղաղության խաչմերուկ« ծրագիրը՝ որպես լուծում։
«Ընդգծել եմ, որ չնայած բոլոր մարտահրավերներին, բարդություններին, դանդաղեցումներին, որոշ դեպքերում՝ ապակառուցողականությանը, ՀՀ-ն վճռական է ու հաստատակամ կառուցելու խաղաղություն Հարավային Կովկասում, շարունակելու խաղաղության բանակցությունները, և հավատում ենք, որ երկուստեք կառուցողական մոտեցման դեպքում, քաղաքական կամքի դեպքում մենք շատ մոտ ապագայում կարող ենք շոշափելի հանգրվանի հասնել խաղաղության հաստատման հարցում»։
