Չինաստանում հզոր երկրաշարժ է տեղի ունեցել․ կա առնվազն 118 զոհ
Չինաստանի հյուսիս-արևմուտքում տեղի ունեցած 6,2 մագնիտուդով երկրաշարժի հետևանքով առնվազն 118 մարդ է զոհվել, հարյուրավոր մարդիկ՝ վիրավորվել։
Երկրաշարժը տեղի է ունեցել դեկտեմբերի 18-ին՝ կեսգիշերից առաջ։ Գանսու նահանգում 105 մարդ է զոհվել, 250-ից ավելի մարդ՝ վիրավորվել։ Իսկ հարևան Ցինհայ նահանգում 13 մարդ է զոհվել, 182 մարդ՝ վիրավորվել։
Ցնցումների հետևանքով վնասվել է ավելի քան 5000 տուն, բազմաթիվ ճանապարհներ։ Խափանվել են էլեկտրամատակարարումն ու ջրամատակարարումը։ Փրկարարներն աշխատում են ըստ Ցելսիուսի սանդղակի -13 աստիճանի պայմաններում՝ փորձելով փլատակներից գտնել ողջ մնացածներին։ Ըստ իշխանությունների՝ հաշվի առնելով ցածր ջերմաստիճանը՝ ողջ մնացածներին գտնելու ժամանակը սովորականից ավելի կարճ է։
Իշխանություններն արագորեն ժամանակավոր ճամբարներ են պատրաստել տարհանվածների համար։
