Ռուսաստանը զինտեխնիկա է տեղափոխել Սիրիայում գտնվող իր ռազմաբազաներ
Ռուսաստանը նոր համաձայնագրի շրջանակում առաջին անգամ զինտեխնիկա է հասցրել Սիրիայում գտնվող իր ռազմական օբյեկտներ։ Մոսկվան և Դամասկոսը պայմանավորվել են Տարտուսի նավահանգիստն ու Հմեյմիմի ավիաբազան վերածել համատեղ ուսումնական և կարողությունների զարգացման կենտրոնների։
«Al Jazeera»-ի փոխանցմամբ՝ ռուսական չորս նավ սեպտեմբերի 7-ին հասել է Տարտուսի նավահանգիստ՝ օգոստոսին Մոսկվայի և Դամասկոսի միջև համաձայնագրի ստորագրումից հետո առաջին նման մատակարարումն իրականացնելով։
Սիրիան օգոստոսի սկզբին հայտարարել էր, որ 18 ամիս տևած բանակցություններից հետո կողմերը փոխըմբռնման հուշագիր են ստորագրել։ Դրա համաձայն՝ Տարտուսն ու Հմեյմիմը, որոնք երկար տարիներ Ռուսաստանի հիմնական ռազմական հենակետերն էին Միջերկրական ծովում և Մերձավոր Արևելքում, պետք է վերածվեն համատեղ ուսումնական և կարողությունների զարգացման կենտրոնների։
Սիրիայի արտաքին գործերի նախարարության տվյալներով՝ օբյեկտների քաղաքացիական գործունեության վերահսկողությունն անցնելու է Դամասկոսին։
Ռուսաստանի նախագահ Վլադիմիր Պուտինն ու Սիրիայի նախագահ Ահմեդ ալ-Շարան շարունակում են քննարկել երկու ռազմաբազաների հետագա կարգավիճակը։
