ԱՀԿ-ն հայտարարել է հյուսիսային Գազայի Աշ-Շիֆա հիվանդանոցի հետ կապը կորցնելու մասին

Առողջապահության համաշխարհային կազմակերպությունը (ԱՀԿ) կորցրել է կապը Գազայի հյուսիսում գտնվող Աշ-Շիֆա հիվանդանոցում գտնվող իր կոնտակտների հետ։

«Քանի որ հիվանդանոցի բազմիցս հարձակումների մասին սարսափելի տեղեկություններ են հայտնվում, մենք կարծում ենք, որ մեր կոնտակտները միացել են տասնյակ հազարավոր տեղահանված մարդկանց, որոնք ապաստան են գտել հիվանդանոցի տարածքում և լքում են տարածքը: Տեղեկություններ կան, որ հիվանդանոցից փախած որոշ մարդկանց վրա կրակել են, վիրավորել և նույնիսկ սպանել։

Հաղորդվում է, որ «Աշ-Շիֆա» հիվանդանոցը, որը Գազայի ամենամեծ բժշկական համալիրն է, վերջին 48 ժամվա ընթացքում բազմիցս ենթարկվել է հարվածների, ինչի հետևանքով մի քանի մարդ զոհվել է, շատերը վիրավորվել են: Հրետակոծման հետևանքով վնասվել է ինտենսիվ թերապիայի բաժանմունքը, վնասվել են նաև հիվանդանոցի այն հատվածները, որտեղ պատսպարվել են տեղահանված մարդիկ: Հաղորդվում է, որ ինտուբացված հիվանդը մահացել է, երբ ինչ-որ պահի հիվանդանոցը հոսանքազրկվել է:

Վերջին տեղեկությունների համաձայն՝ հիվանդանոցը շրջապատված է տանկերով: Անձնակազմը հայտնել է մաքուր ջրի պակասի և այն վտանգի մասին, որ մնացած վերջին խիստ կարևոր գործառույթները, ներառյալ ինտենսիվ թերապիայի բաժանմունքները, թոքերի արհեստական շնչառության սարքավորումները և ինկուբատորները, շուտով կանգ կառնեն վառելիքի պակասի պատճառով, ինչը անմիջական վտանգի կենթարկի հիվանդների կյանքը:

ԱՀԿ-ն լրջորեն մտահոգված է բուժաշխատողների, հարյուրավոր հիվանդների և վիրավորների, այդ թվում՝ կենսապահովման սարքավորումներին միացված երեխաների և հիվանդանոցներում մնացած տեղահանվածների անվտանգության համար: Հաղորդվում է, որ ստացիոնար հիվանդների թիվը գրեթե կրկնապատկվել է, նույնիսկ անհապաղ օգնության ծառայությունների սահմանափակումից հետո», – ասվում է ԱՀԿ-ի հայտարարության մեջ:

ԱՀԿ-ն կրկնում է Գազայում կրակը անհապաղ դադարեցնելու իր կոչը՝ որպես կյանքեր փրկելու և տառապանքի սարսափելի մակարդակը նվազեցնելու միակ միջոց։ Հիվանդանոցները, հիվանդները, բժշկական անձնակազմը և առողջապահական հաստատություններում ապաստանած անձինք պաշտպանված են Ժնևի կոնվենցիաներով և միջազգային մարդասիրական իրավունքով:

«ԱՀԿ-ն նաև կոչ է անում ապահովել Ռաֆահի սահմանային անցակետով ծանր վիրավորվածների և հիվանդների մշտական, կարգավորված, անարգել և անվտանգ բժշկական տարհանումը:

Բոլոր պատանդները պետք է ստանան համապատասխան բուժօգնություն և անվերապահ ազատ արձակվեն»,- ընդգծվում է հայտարարության մեջ։