Եվրոպական հարթակում կարևոր պայմանավորվածություններ ենք ձեռք բերել Ադրբեջանի հետ. Արթուր Հովհաննիսյան
ՀՀ իշխանությունը նպաստավոր է համարում եվրոպական հարթակում բանակցությունները։ Ազգային ժողովում ճեպազրույցների ժամանակ հայտարարեց «Քաղաքացիական պայմանագիր» կուսակցության քարտուղար Արթուր Հովհաննիսյանը` անդրադառնալով Բրյուսելում սպասվող հանդիպման չեղարկմանը։
Հարցին`արդյոք այդ հանդիպման չեղարկումը նշանակում է` Արևմուտքը ձախողել է այդ գործընթացում և ուզում է զրոյացնել պայմանավորվածությունները, որոնք ձեռք են բերվել այս հարթակում և նոր առևտուր սկսել Հայաստանի հետ, իշխանական պատգամավորը պատասխանեց.
«Բրյուսելի այցը չեղարկվել է, բայց մենք հայտնել ենք մեր պատրաստակամությունը եվրոպական հարթակում հանդիպելու։ ՀՀ-ն որևէ կողմի հետ առևտրի մեջ չէ, և ոչ էլ որևէ կողմն է Հայաստանի հետ առևտրի մեջ։ Մենք պատրաստակամ ենք եվրոպական հարթակում շարունակել մեր քննարկումները Ադրբեջանի հետ։ Կարևոր պայմանավորվածություններ ենք ձեռք բերել Ադրբեջանի հետ եվրոպական հարթակում ոչ մեկ փուլով, մի քանի փուլերով»,- նշեց նա։
Նա հավելեց, որ ակնկալում են, որ առաջիկայում եվրոպական գործընկերների ջանքերով հանդիպում կկազմակերպվի Ադրբեջանի նախագահ Իլհամ Ալիևի հետ եվրոպական հարթակում։
