Վրաստանը ՌԴ-ի հետ չի բանակցել ավիահաղորդակցության վերսկսման շուրջ. Իրակլի Ղարիբաշվիլի
Վրաստանի և Ռուսաստանի միջև ուղիղ ավիահաղորդակցության վերսկսումը ՌԴ նախագահ Վլադիմիր Պուտինի նախաձեռնությունն էր, այլ ոչ թե երկու երկրների կառավարությունների միջև բանակցությունների արդյունք: Այդ մասին լրագրողներին հայտնել է Վրաստանի վարչապետ Իրակլի Ղարիբաշվիլին:
Իր հերթին ՌԴ ԱԳ նախարար Սերգեյ Լավրովը ՏԱՍՍ-ում սեպտեմբերի 28-ին հրապարակված հարցազրույցում հայտնել է, որ Ռուսաստանի իշխանությունները Ղարիբաշվիլիի կառավարության հետ համաձայնության են եկել թռիչքների վերսկսման շուրջ և չեղարկել այցագրային ռեժիմը։
«Ռուսաստանի նախագահն ասել է, որ անայցագիր ռեժիմը և թռիչքների վերսկսումը եղել է իր միանձնյա որոշումը: Այն, ինչ այսօր ասել է պարոն Լավրովը, փաստի հավաստում է: Իհարկե, համաձայնագիրը ձևակերպվել է Վրաստանի կառավարության հետ:
Մասնավորապես, Էկոնոմիկայի նախարարության քաղաքացիական ավիացիայի գործակալությունը թույլտվություն է տվել ռուսական համապատասխան ընկերություններին… Մենք ոչ մի բանակցություն չենք վարել», – լրագրողներին ասել է Ղարիբաշվիլին։
Մայիսի 10-ին ՌԴ նախագահ Վլադիմիր Պուտինը հրամանագիր է ստորագրել մայիսի 15-ից Վրաստանի քաղաքացիների համար այցագրային ռեժիմը վերացնելու մասին։ Մեկ այլ հրամանագրով նա չեղարկել է ռուսական ավիաընկերությունների թռիչքների և դեպի Վրաստան տուրերի վաճառքի արգելքը, որը գործում էր 2019 թվականից։ Մի քանի ավիաընկերություններ արդեն երկրների միջև կանոնավոր չվերթեր են իրականացնում։
