Առաջին անգամը չէ, որ Շեյխ ուլ Իսլամ Փաշազադեն նման մեղադրանքներ է հնչեցնում Ամենայն Հայոց Հայրապետի և Հայոց Եկեղեցու հասցեին. Մայր Աթոռից արձագանքում են
Կովկասի մահմեդականների վարչության նախագահ, Շեյխ ուլ Իսլամ Ալլահշուքյուր Փաշազադեն երեկ ադրբեջանական ԱՊԱ գործակալության հետ զրույցում անդրադարձել էր Գարեգին Բ Ամենայն Հայոց Կաթողիկոսի հետ հանդիպման հնարավորությանը՝ նկատելով, որ հանդիպում դեռ հնարավոր չէ։
«Անհայտ է, թե արդյոք մենք կհանդիպե՞նք Հայաստանի հոգևոր առաջնորդի հետ։ Մենք միշտ հանդիպել ենք պատրիարք Կիրիլի միջնորդությամբ։
Սակայն հայ հոգևոր առաջնորդի ռևանշիստական քաղաքականության և հայերի առճակատման կոչի պատճառով մեր հանդիպումը դեռ հնարավոր չէ։ Նրա գործողությունները թույլ չեն տալիս այս հանդիպմանը կայանալ»,- պարզաբանել էր Փաշազադեն։
Մայր Աթոռ Սուրբ Էջմիածնի տեղեկատվական համակարգի տնօրեն Տեր Եսայի քահանա Արթենյանն այս առնչությամբ 168.am-ի հարցադրումներին ի պատասխան՝ ասաց.
«Առաջին անգամը չէ, որ Շեյխ ուլ Իսլամ Փաշազադեն նման մեղադրանքներ է հնչեցնում Ամենայն Հայոց Հայրապետի և Հայոց Եկեղեցու հասցեին։ Ժամանակին այդ ամենին պատշաճ արձագանք տրվել է։ Հարկ չենք նկատում վերստին անդրադառնալ այս թեմային»:
