Վրաստանում ընդդիմությունը պահանջել է գործ հարուցել վարչապետ Ղարիբաշվիլիի դեմ
Վրաստանի «Միասնական ազգային շարժում» ընդդիմադիր կուսակցությունը դիմել է դատախազություն՝ պահանջելով հետաքննություն սկսել վարչապետ Իրակլի Ղարիբաշվիլիի նկատմամբ` անձնական նպատակներով բյուջետային միջոցների հնարավոր յուրացման գործով: Ինչպես տեղեկանում ենք ТАСС-ից, այս մասին լրագրողներին հայտնել է կուսակցության հակակոռուպցիոն հարցերով քարտուղար Վասո Ուրուշաձեն։
«Մենք պարտադիր ենք համարում տարածված տեղեկատվությանն իրավական ընթացք տալը, պաշտոնական հայտարարությունը Վրաստանի դատախազություն ներկայացնելը և Իրակլի Ղարիբաշվիլիի նկատմամբ քրեական գործի հարուցումը պահանջելը», – ասել է նա դատախազության շենք մտնելուց առաջ։
«Լելոն Վրաստանի համար» ընդդիմադիր խորհրդարանական կուսակցությունը նախօրյակին հայտարարել էր հանրապետության վարչապետի դեմ իմփիչմենթի գործընթաց սկսելու իր պլանների մասին։ Դրա համար հիմք են դարձել այն տեղեկությունները, թե Ղարիբաշվիլին մասնավոր ուղևորություն է կատարել Գերմանիայից ԱՄՆ։ Պնդվում էր, թե դրա համար Ղարիբաշվիլին օգտվել է կառավարական ինքնաթիռից։ Նախարարների կաբինետում հերքել են այս տեղեկությունը՝ հայտնելով, որ վարչապետը Գերմանիա է մեկնել չարթերային չվերթով, ընդ որում՝ բյուջետային միջոցներ չեն ծախսվել։ Ղարիբաշվիլին, ըստ նախարարների կաբինետի, Գերմանիայից ԱՄՆ է մեկնել կանոնավոր չվերթով։
Կառավարության անդամի իմփիչմենթի ընթացակարգ սկսելու համար 150 պատգամավորներից 50-ը պետք է դիմեն Վրաստանի Սահմանադրական դատարան։ Եթե մեկ ամսվա ընթացքում հաստատվի, որ պաշտոնյան խախտել է օրենքը, խորհրդարանը երկու շաբաթվա ընթացքում պետք է քննարկի իմփիչմենթի որոշումը։ Կառավարության անդամը կհամարվի պաշտոնից ազատված, եթե կողմ քվեարկի պատգամավորների մեծամասնությունը։
