ԱԺ աշխատակազմը հերթական պարգևավճարն է ստացել՝ նախկին 30 տոկոսի փոխարեն՝ այս անգամ աշխատավարձի 80 տոկոսի չափով

Հուլիսի 14-ին, ԱԺ նախագահ Ալեն Սիմոնյանի կարգադրության համաձայն՝ ԱԺ աշխատակազմը հերթական պարգևատրումներն է ստացել, բայց, ինչպես ասում են, այս անգամ կենացները քաղցրացել են՝ նախկին 30 տոկոսի փոխարեն՝ այս անգամ նրանք աշխատավարձի 80 տոկոսի չափով են պարգևատրվել։

«Ղեկավարվելով «Ազգային ժողովի կանոնակարգ» սահմանադրական օրենքի 5-րդ հոդվածի 2-րդ մասի 22-րդ կետով և «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքի 22-րդ հոդվածով` կարգադրում եմ.

1. Ազգային ժողովի աշխատակազմի պետական ծառայողներին խրախուսել միանվագ դրամական պարգևատրմամբ ամսական պաշտոնային դրույքի 80%-ի չափով՝ համաձայն հավելվածի:

2. Ազգային ժողովի աշխատակազմի ղեկավար-գլխավոր քարտուղար Դ. Առաքելյանին՝ Հայաստանի Հանրապետության օրենսդրությամբ սահմանված կարգով ապահովել համապատասխան վճարումների կատարումը»,- նշված է կարգադրության մեջ:

Նշենք, որ հուլիսի 14-ին ԱԺ պաշտոնական կայքում միայն հրապարակված էր պարգևատրման մասին կարգադրությունը, սակայն այդ վերնագրի տակ որևէ տեքստ չկար, օրեր անց են ավելացրել տեքստը։