Փաշինյանն էրդողանի և մյուս հյուրերի հետ կայցելի՞ Աթաթուրքի դամբարան
Մայիսի 28-ին Թուրքիայում կայացած նախագահական ընտրությունների երկրորդ փուլում 52,18%-ով իր մրցակցին՝ ընդդիմության ընդհանուր թեկնածու Քեմալ Քըլըչդարօղլուին հաղթելուց հետո, այսօր Ռեջեփ Թայիբ Էրդողանի երդմնակալության հանդիսավոր արարողությունն է։
Արարողությանը ներկա են լինելու հյուրեր 78 երկրներից։ Թուրքական ԶԼՄ-ների փոխանցմամբ՝ Էրդողանի երդմնակալությանը, մասնավորապես, մասնակցելու են 21 պետությունների ղեկավարներ և 13 վարչապետներ, խորհրդարանների ներկայացուցիչներ, նախարարներ, միջազգային կազմակերպությունների ներկայացուցիչներ։ Ի թիվս այլ հյուրերի, Անկարայում է ՆԱՏՕ-ի գլխավոր քարտուղար Յենս Ստոլտենբերգը, Ռուսաստանից՝ Պետդումայի նախագահ Վյաչեսլավ Վոլոդինը։ Էրդողանը երդմնակալությունից հետո պետք է այցելի Անիթքաբիր, որն Անկարայում է, Մուսթաֆա Քեմալ Աթաթուրքի դամբարանը։
Նախագահական համալիրում արարողությունները սկսվել են 17:00-ին, որին կհաջորդի գալա-ընթրիք գլխավոր հյուրերի հետ Չանքայա պալատում, ժամը 19։00-ին: Սպասվում է, որ նա ճաշից հետո կհայտարարի իր կառավարության կազմը:
Երդմնակալության արարողության նման «երթուղին» կարծես ավանդույթ է դարձել Էրդողանի համար, ով 2018 թվականին ևս Թուրքիայի խորհրդարանի՝ Ազգային մեծ ժողովի հատուկ նիստում երդմնակալության հանդիսավոր արարողությունից հետո մեկնել էր Անիթքաբիր, ծաղկեպսակ էր զետեղել և գրառում արել պատվավոր հյուրերի մատյանում: Անիթքաբիրում էլ Էրդողանը հանդես էր եկել կարճ ելույթով: Նա, մասնավորապես, ասել էր, որ իբրև նախագահական համակարգի առաջին նախագահ՝ խոստանում է «ամրապնդել ժողովրդի միասնությունն ու եղբայրությունը, մեծացնել ու բարձրացնել երկիրը»:
Ուշագրավն այն է, որ Թուրքիա է մեկնել նաև Նիկոլ Փաշինյանը՝ մասնակցելու Թուրքիայի նախագահի երդմնակալության արարողությանը։
Փաշինյանի թուրքական այցի օրակարգի մասին ոչինչ հայտնի չէ, հայտնի չէ՝ սպասվո՞ւմ է արդյոք հանդիպում Էրդողանի կամ այլ պաշտոնյաների հետ, հայտնի չէ նաև, թե Նիկոլ Փաշինյանը կլինի՞ այն հյուրերի շարքում, որոնք ևս Էրդողանի հետ կմեկնեն Անիթքաբիր՝ հարգանքի տուրք մատուցելու Աթաթուրքի դամբարանում։
