Գալուզինն ընդգծել է Բաքվի և Երևանի միջև կարգավորման ջանքերի ակտիվացման անհրաժեշտությունը
Հայաստանի Հանրապետության արտաքին գործերի փոխնախարարներ Վահե Գևորգյանը և Մնացական Սաֆարյանն ապրիլի 25-ին Երևանում խորհրդակցություններ են անցկացրել ՌԴ փոխարտգործնախարար Միխայիլ Գալուզինի հետ: Գալուզինը նաև առանձնազրույց է ունեցել ՀՀ արտգործնախարար Արարատ Միրզոյանի հետ: Այս մասին տեղեկանում ենք ՌԴ արտգործնախարարության տարածած հաղորդագրությունը:
«Ուշադրության կենտրոնում մտքերի փոխանակությունն էր երկկողմ հարաբերությունների և տարածաշրջանային անվտանգության ապահովման խնդիրների շուրջ», – նշված է հաղորդագրությունում։
Ըստ ՌԴ ԱԳՆ-ի՝ կողմերը նշել են ռուս-հայկական դաշնակցային համագործակցության դրական դինամիկան։
«Ընդգծվել է բարձր և բարձրագույն մակարդակներում երկխոսության առաջանցիկ զարգացումը, ինչպես նաև համագործակցության ընդլայնումը պրոֆիլային գերատեսչությունների միջև՝ խորհրդարանական գծով, միջտարածաշրջանային շփումների և մշակութային կապերի միջոցով։ Նշվել է առևտրատնտեսական հարաբերությունների ռեկորդային դինամիկան։ Գոհունակություն է արտահայտվել միջազգային կազմակերպություններում Ռուսաստանի և Հայաստանի միջև համակարգվածության աստիճանի առնչությամբ», – հավելել են ՌԴ ԱԳՆ-ում։
Մանրամասնորեն քննարկվել է նաև Լեռնային Ղարաբաղում տիրող իրավիճակը:
«Կողմերը նաև հանգամանորեն քննարկել են տարածաշրջանում տիրող իրավիճակը՝ առաջին հերթին Լեռնային Ղարաբաղում ռուսական խաղաղապահ զորակազմի պատասխանատվության գոտում իրավիճակի սրման համատեքստում, ինչը լուրջ մտահոգություն է առաջացնում։ Նախանշվել է հայ-ադրբեջանական հարաբերությունների կարգավորման բոլոր ուղղություններով ջանքերն ակտիվացնելու անհրաժեշտությունը՝ Ռուսաստանի, Հայաստանի և Ադրբեջանի ղեկավարների միջև 2020 թ. նոյեմբերի 9-ին, 2021 թ. հունվարի 11-ին, նոյեմբերի 26-ին և 2022 թ. հոկտեմբերի 31-ի պայմանավորվածություններին համապատասխան», եզրափակել են Ռուսաստանի արտաքին քաղաքական գերատեսչությունում։
