Մենք միշտ վառ ենք պահում Հայոց ցեղասպանության զոհերի հիշատակը. Անդրեա Կազու
Իտալիայի պատգամավորների պալատի անդամ, Դեմոկրատական կուսակցությունը ներկայացնող Անդրեա Կազուն անդրադարձել է Հայոց ցեղասպանությանը՝ շեշտելով, որ Իտալիայում «Հայոց ցեղասպանության զոհերի հիշատակի օրը և յուրաքանչյուր օր մենք միշտ վառ ենք պահում զոհերի հիշատակը»։ Այս մասին տեղեկացնում է Իտալիայում Հայաստանի դեսպանության «Ֆեյսբուք»-ի էջը։
«1915 թվականի ապրիլի 24-ի գիշերը սկսվում են ձերբակալությունները. մեկ ամսվա ընթացքում բազմաթիվ հայեր, այդ թվում՝ լրագրողներ, գրողներ, բանաստեղծներ և խորհրդարանի անդամներ արտաքսվեցին և կոտորվեցին Անկարա տանող ճանապարհին:
Գարնանը, զինվորականների զինաթափումից ու կոտորածից հետո, օսմանյան իշխանությունները սկսեցին հայ ժողովրդի զանգվածային տեղահանությունը, որին հաջորդեց սիստեմատիկ սպանությունների արշավը։
Մեծամասնությունը բնաջնջվել են մահվան երթերի միջոցով, փոքրաթիվ փրկվածները մահանում էին սովից՝ հասնելով սիրիական անապատի ճամբարներ:
Արդյունքում սպանվեց մեկուկես միլիոն մարդ, այդ թվում՝ հայ կանայք, տղամարդիկ և երեխաներ, ինչպես նաև ասորիներ և հույներ, որոնք անհետացան ավելի քան երկու հազար տարի իրենց կողմից բնակեցված հողերից։
Հայոց ցեղասպանության զոհերի հիշատակի օրը և յուրաքանչյուր օր մենք միշտ վառ ենք պահում զոհերի հիշատակը Իտալիայում, «որպեսզի անցյալի տառապանքներից ծագի ժողովուրդների և պետությունների միջև խաղաղությամբ և փոխըմբռնմամբ լցված ապագան», ինչպես գրված է Նախագահ Մատարելլայի՝ Երևանում գտնվող հուշահամալիր այցելության կապակցությամբ տնկված ծառի մոտ տեղադրված ցուցանակին»,- նշել է Իտալիայի պատգամավորների պալատի անդամ։
