«Արցախն Ադրբեջանի կազմում տեսնո՞ւմ եք»․ Վահան Քերոբյանը չպատասխանեց հարցին՝ հորդորելով իրեն տնտեսությունից հարցեր տալ
Կառավարության այսօրվա նիստի ավարտից հետո լրագրողներն Էկոնոմիկայի նախարար Վահան Քերոբյանին հարցրեցին, թե Արցախը 10 օրից ավելի լինելով շրջափակման մեջ՝ էկոնոմիկայի, տնտեսության վրա ի՞նչ ազդեցություն է ունեցել, արդյոք Արցախի գործընկերների հետ այս հարցերը քննարկե՞լ են։
«Քանի դեռ չունենք «խաղաղության պայմանագիր», ներդրումների համար ամենաբարենպաստ միջավայր, կարելի է ասել՝ չենք կարող ունենալ, որովհետև երկարատև խաղաղությունը խոշոր ներդրումներ ներգրավելու ամենակարևոր նախապայմանն է և միայն այդ դեպքում է հնարավոր ներգրավել խոշոր ներդրումային ծրագրեր»,- պատասխանեց Քերոբյանը։
Հարցին՝ տեղյա՞կ եք արդյոք, Արցախում պարենի խնդիրներ կա՞ն, Քերոբյանը պատասխանեց, որ մշտապես կապի մեջ է Արցախի իր գործընկերների հետ․
«Կարող եմ ասել, որ որոշակի տիպի պարենային ապրանքների խնդիր կա, հիմնականում դա թարմ գյուղմթերքին է վերաբերում, բայց նաև այլ ապրանքների, որոնք կամաց-կամաց սպառվում են»։
Ռուս խաղաղապահների միջոցով չե՞ք պատրաստվում օգտակար լինել արցախցիներին, արդյոք նման տարբերակ քննարկվե՞լ է՝ լրագրողները հարցրեցին նախարարին։
«Այդ հարցով զբաղվում են իմ գործընկերները՝ Անվտանգության խորհուրդը, ԱԳՆ-ն, մյուս գործընկերները, այս և այլ տարբերակներ են քննարկվում, բայց Կառավարության պաշտոնական տեսակետը հրապարակվում է իմ գործընկերների կողմից, որը ես չեմ ուզում կրկնել»։
Գործադիրի և օրենդիրի ձեր գործընկերները խուսափում են պատասխանել՝ Արցախն Ադրբեջանի կազմի մեջ տեսնո՞ւմ են, թե՞ ոչ, ինչպիսի՞ն է ձեր մոտեցումն այս հարցի վերաբերյալ, Վահան Քերոբյանին հարցրեցին լրագրողները։
«Ես այս հարցի վերաբերյալ վստահում եմ իմ գործընկերներին, և իմ գործընկերներին պետք է այդ հարցը տաք, ինձ տնտեսության մասին հարցեր տվեք»։
Հիշեցնենք, որ դեկտեմբերի 12-ին, ժամը 10։30-ի սահմաններում, ադրբեջանական կողմը խախտելով 2020 թվականի նոյեմբերի 9-ի եռակողմ հայտարարության դրույթները, բնապահպանական պատճառաբանություններով փակել է Արցախն աշխարհին կապող կյանքի միակ ճանապարհը՝ ոտնահարելով քաղաքացիական բնակչության կենսական շահերն ու իրավունքները:
Այս պահին Ստեփանակերտի Հանրապետական հիվանդանոցում կան հիվանդներ, որոնց պետք է տեղափոխեն Երևան՝ վիրահատելու համար, սակայն ճանապարհի փակ լինելու հետևանքով նրանց տեղափոխումն անհնարին է դառնում։ Միայն Կարմիր խաչի միջնորդությամբ կարողացել են մեկ հոգու տեղափոխել Երևան՝ վիրահատելու նպատակով։
