«Կարմիր խաչի միջնորդությամբ Արցախից մեկ պացիենտ է տեղափոխվել Հայաստան». Զառա Ամատունի
168.am-ի հետ զրույցում Կարմիր խաչի միջազգային կոմիտեի հայաստանյան գրասենյակի հաղորդակցության ծրագրերի պատասխանատու Զառա Ամատունին ասաց, որ Կարմիր Խաչի միջնորդությամբ Արցախից մեկ հիվանդ է տեղափոխվել Երևան։
«Կարմիր Խաչի միջազգային կոմիտեի չեզոք միջնորդությամբ Արցախից մեկ պացիենտ է տեղափոխվել Հայաստան»,- փոխանցեց Զառա Ամատունին։
Հարցին՝ Կարմիր խաչը պատրաստվո՞ւմ է հումանիտար աջակցություն հասցնել Արցախ և արդյո՞ք նախատեսվում է այլ հիվանդների ևս տեղափոխել Հայաստան, Զառա Ամատունին պատասխանեց.
«Մենք պատրաստակամ ենք աջակցել մարդասիրական հարցերում՝ ստեղծված իրավիճակի կապակցությամբ, և այս կապակցությամբ կապի մեջ ենք նաև համապատասխան իշխանությունների ներկայացուցիչների, որոշում կայացնողների հետ։ Բնականաբար, այս առումով ցանկացած գործողություն մեր որոշումը չէ, այլ քննարկվում և համապատասխանեցվում է, այսպես ասած՝ կարիքներին։
Մենք ներկայացված ենք ամբողջ տարածաշրջանում և ունենք գրասենյակ նաև Լեռնային Ղարաբաղում և համապատասխան կառույցների հետ կապի մեջ ենք։ Սակայն մեր որոշումը չէ, թե ում պետք է տեղափոխել և մնացած մանրամասները, սա որոշվում է համապատասխան կառույցների կողմից, իսկ մենք պատրաստ ենք աջակցելու»։
Ինչ վերաբերում է Ստեփանակերտում ծանր վիճակում գտնվող 4 ամսական երեխայի տեղափոխմանը, Զառա Ամատունին կրկնեց, որ նման որոշումները կայացնում են համապատասխան կառույցները։
Հիշեցնենք, որ դեկտեմբերի 12-ին, ժամը 10։30-ի սահմաններում, ադրբեջանական կողմը խախտելով 2020 թվականի նոյեմբերի 9-ի եռակողմ հայտարարության դրույթները, բնապահպանական պատճառաբանություններով փակել է Արցախն աշխարհին կապող կյանքի միակ ճանապարհը՝ ոտնահարելով քաղաքացիական բնակչության կենսական շահերն ու իրավունքները: Այս պահին Ստեփանակերտի Հանրապետական հիվանդանոցում կան հիվանդներ, որոնց պետք է տեղափոխեն Երևան՝ վիրահատելու համար, սակայն ճանապարհի փակ լինելու հետևանքով նրանց տեղափոխումն անհնարին է դառնում։
