Մասկը խոստովանել է, որ մեծ դժվարությամբ Է գլուխ հանում Tesla-ի խնդիրներից
Ամերիկացի միլիարդատեր Իլոն Մասկն ընդունել է, որ «մեծ դժվարությամբ» է գլուխ հանում մատակարարումների շղթայի խախտման պատճառով իր Tesla ընկերության առջեւ ծառացած դժվարություններից։
«Մեծ դժվարությամբ: Ես աշխատում եմ իմ հնարավորությունների սահմաններում՝ առավոտից մինչեւ երեկո, շաբաթը յոթ օր»,- հայտարարել է Մասկն Ինդոնեզիայում Business 20 (B20) գործարար համաժողովում առցանց ձեւաչափով ունեցած իր ելույթի ժամանակ, պատասխանելով այն հարցին, թե ինչպես է նա գլուխ հանում դժվարություններից, որոնք վերապրում է ընկերությունը մատակարարումների շղթայի խախտման ֆոնին:
Հարցազրույցի տեսագրությունը Twitter-ի իր էջում զետեղել է Bloomberg գործակալությունը: B20 միջազգային հանդիպումը Բալիում նոյեմբերի 13-14-ին անցկացվում է G20-ի գագաթնաժողովի հարթակներում:
Tesla Motors ամերիկյան ընկերությունը հիմնադրվել է 2003 թվականին՝ որպես էլեկտրամոբիլների եւ դրանց հետ կապված տեխնոլոգիաների մշակող ու արտադրող:
Ընկերության կենտրոնակայանը գտնվում է Փալո-Ալթոյում (ԱՄՆ-ի Կալիֆոռնիայի նահանգ): Բացի էլեկտրամոբիլներից, ընկերությունը սեփական տեխնոլոգիայով արտադրում է մարտկոցներ ու էլեկտրաշարժիչներ եւ դրանք վաճառում ավտոմոբիլային այլ ընկերությունների, մասնավորապես, Toyota-ին ու Daimler-ին, հաղորդել է ՌԻԱ Նովոստին:
