Շրջանառության մեջ է դրվել «Ավրորա» մրցանակի դափնեկիր Ջուլիեն Լուսենգեին նվիրված նամականիշ

«Ավրորա» մարդասիրական նախաձեռնություն. «Ավրորա» մրցանակի դափնեկիրներ. Ջուլիեն Լուսենգե» թեմային նվիրված մեկ նամականիշ է 2022 թվականի հոկտեմբերի 31-ին շրջանառության մեջ դրվել:

Ինչպես հայտնում են «ՀայՓոստ»-ից, նամականիշի մարումն իրականացրել են Հայաստանի Հանրապետության բարձր տեխնոլոգիական արդյունաբերության նախարարի տեղակալ Դավիթ Սահակյանը, Ավրորա մարդասիրական հիմնադրամի Արցախի ծրագրերի ղեկավար Նարինե Աղաբալյանը, «ՀայՓոստ» ընկերության գլխավոր գործադիր տնօրենի պաշտոնակատար Արայիկ Աբրահամյանը, Ֆիլատելիստների հայկական ասոցիացիայի նախագահ Հովիկ Մուսայելյանը:

Փոստային նամականիշն ունի 350 դրամ անվանական արժեք: Այն տպագրված է Ֆրանսիայի «Cartor» տպագրատանը՝ 12 000 տպաքանակով: Նամականիշի դիզայնի հեղինակն է Ալլա Մինգալյովան:

Փոստային նամականիշի հետ մեկտեղ «ՀայՓոստ»-ը թողարկել է 150 ՀՀ դրամ արժողությամբ նվիրատվության կտրոն: Կտրոնների վաճառքից գոյացած հասույթը «ՀայՓոստ»-ը կփոխանցի «Ավրորա» մարդասիրական նախաձեռնությանը:

Նամականիշի վրա պատկերված է «Ավրորա» մրցանակի վեցերորդ դափնեկիր, Կոնգոյի մարդու իրավունքների պաշտպան Ջուլիեն Լուսենգեն: Նա Կանանց համերաշխություն հանուն ներառական խաղաղության և զարգացման կազմակերպության (SOFEPADI) համահիմնադիր ու նախագահ է, ինչպես նաև՝ Կոնգոյացի կանանց հիմնադրամի (FFC) համահիմնադիր, որը տարիներ շարունակ աջակցել է պատերազմի ժամանակ Կոնգոյի Դեմոկրատական Հանրապետությունում (ԿԴՀ) սեռական բռնության զոհերին։ Վերջին 40 տարում Ջուլիեն Լուսենգեի ջանքերի շնորհիվ արդարադատության առաջ է կանգնել բռնություն և պատերազմական հանցագործություններ իրագործած ավելի քան 800 մարդ:

Նամականիշի թողարկման օրը` 31 հոկտեմբերի 2022թ.

Դիզայնը՝ Ալլա Մինգալյովայի

Տպարանը` Cartor, Ֆրանսիա

Չափսերը` 50,0 x 50,0 մմ

Մեկ թերթի վրա՝ 6 հ.

Տպաքանակը՝ 12 000 հ.