Սահակաշվիլին դատավարությանը չի կարողացել ներկայանալ առողջության վատթարացման կապակցությամբ
Վրաստանի նախկին նախագահ, այժմ Ուկրաինայի քաղաքացի Միխեիլ Սահակաշվիլին, որն անցյալ տարվա հոկտեմբերից գտնվում է բանտարկության մեջ, մայիսի 2-ին դատավարությանը չի կարողացել ներկայացնալ առողջության վատթարացման կապակցությամբ: Փաստաբան Նիկա Գվարամիան դատավարության ժամանակ հայտարարել է, որ Սահակաշվիլին տեղաշարժման հետ կապված խնդիրներ ունի եւ նրա մոտ խախտված է խոսքի արտաբերումը:
Դրա հետ կապված դատավոր Նինո Էլիեշվիլին դատավարության ժամանակ հայտարարել է, որ նամակ կուղարկի Հատուկ պատժական ծառայությանը՝ հանձնարարելով սպառիչ տեղեկություն տալ Սահակաշվիլիի առողջական վիճակի եւ նրան ցուցաբերվող բուժօգնության մասին: Իր հերթին Վրաստանի արդարադատության նախարար Ռատի Բրեգաձեն մայիսի 2-ին տեղի ունեցած ճեպազրույցում հայտարարել է, որ վերջին շաբաթներին իր գլխավորած գերատեսչության դեմ ընդդիմադիր քաղաքական գործիչների կողմից տարվում է վարկաբեկման արշավ, թե իբր բանտում Սահակաշվիլիին անհրաժեշտ բժշկական օգնություն չի ցուցաբերվում, եւ նրա կյանքը գտնվում է սպառնալիքի տակ:
«Պատժիչ ծառայությունը Սահակաշվիլիի նկատմամբ ցուցաբերել եւ ցուցաբերում էանհրաժեշտ բժշկական օգնություն, ուստի մեղադրանքներն ապատեղեկատվություն են: Ցանկանում եմ նշել, որ Սահակաշվիլին ընտրողաբար է ընդունում բժիշկների կողմից նշանակված բուժման կուրսը եւ հրաժարվում է նշանակված մի շարք ընթացակարգերից: Մասնավորապես, նա հրաժարվում է բանտի տարածքում, թարմ օդում ամենօրյա զբոսանքներից»,-ասել է նա:
Սահակաշվիլիի ընտանիքի անդամները պահանջում են, որպեսզի նրան տեղափոխերն արտասահմանյան կլինիկա՝ որակյալ բուժում ցուցաբերելու նպատակով: Սահակաշվիլիի մայրը՝ Գիուլի Ալասանիան, լրագրողներին հայտարարել է որ եթե այդ պահանջը չկատարվի իշխանությունների կողմից, ապա արդեն այսօրվանից Վրաստանի ողջ տարածքում կսկսվեն ընդդիմության կողմնակիցների զանգվածային ելույթներ, հաղորդել է «Ինտերֆաքս»-ը:
