Բուժծառայության որակի ապահովման համար կգործի առանձին պատասխանատու ստորաբաժանում
ՀՀ առողջապահության նախարարությունը բարելավում է առողջապահական ծառայությունների որակը: Գերատեսչությունը մշակել է ռազմավարություն, որը բարեփոխումներ է նախատեսում տարբեր ուղղություններով: «Արմենպրես»-ի մամուլի սրահում հրավիրված ասուլիսում ՀՀ առողջապահության նախարարության Հանրային առողջության բաժնի պետ Կարինե Գաբրիելյանը նշեց, որ ըստ ուսումնասիրությունների, անորակ բժշկական ծառայությունները բերում են անհարկի ծախսերի: ԵՄ-ի տվյալների համաձայն՝ յուրաքանչյուր 10 հիվանդից մեկի մոտ բուժման ընթացքում գրանցվում է վնասում: Մեկ այլ ուսումնասիրության համաձայն էլ՝ այդ վնաս հասցված դեպքերի զգալի հատվածը հնարավոր է կանխարգելել: Հետևաբար` խիստ կարևոր է բժշկական ծառայությունների որակի բարձրացումը:
«Օրինակ, մարդը բուժհաստատությունում բուժվում է մեկ հիվանդության գծով, սակայն ներհիվանդանոցային մեկ այլ վարակ է գումարվում: Մյուս օրինակը, ուշացած, սխալ ախտորոշումն է: Այս և այլ երևույթները պահանջում են ֆինանսական ռեսուրսներ հետևանքները շտկելու համար: Դրանք կանխելու համար լայնածավալ բարեփոխումներ են նախատեսված մի շարք օղակներում»,-ասաց Կարինե Գաբրիելյանը:
Ռազմավարությունը մշակված է մի քանի ուղղություններով՝ բժշկական հաստատությունների կարողությունների հզորացում, կադրերի վերապատրաստում, պատշաճ ենթակառուցվածքներ, նորագույն սարքավորումներ, չափորոշիչների, լիցենզավորման, վերահսկողության գործընթացի բարելավում, բժշկական ծառայությունների մոդելի ընտրություն և այլն: Նախատեսվում է բարեփոխումների աշխատանքում ներգրավել բուժառուներին՝ հաշվի առնելով նրանց կարծիքը, արձագանքը:
«Խնդիր է դրված, որ որակյալ ծառայությունը լինի բժշկության բոլոր օղակներում ու այն ինչ-որ մի փուլից չընդհատվի: Այսինքն՝ քաղաքացին կանխարգելման փուլից սկսած, մինչև բուժում, վերականգնողական ընթացք, ստանա որակյալ բուժծառայություն: Օրինակ լինում են դեպքեր, որ հաջող վիրահատություն է կատարվում, սակայն արդեն վերականգնողական փուլում կապը ընդհատվում է: Այդպես պետք է չլինի»,-ասաց Կարինե Գաբրիելյանը:
Ռազմավարությունը մշակված է, հստակեցված է նաև գործողությունների ծրագիրը: Առաջիկայում նախատեսվում է բոլոր սահմանված նպատակներն իրականացնել մինչև 2026 թվականը: Աշխատանքներն իրականացվելու են փուլային տարբերակով: Առաջիկայում նախատեսվում է ՀՀ առողջապահության նախարարության ենթակայության տակ հիմնել նոր ստորաբաժանում, որը պատասխանատու կլինի հենց բուժծառայությունների համար: Այժմ այդ գծով պատասխանատվությունը բաշխված է տարբեր ստորաբաժանումների միջև: Կարինե Գաբրիելյանը նշեց, որ սա նոր մոտեցում է: Որակի նկատմամբ առանձին հանձնառու ստորաբաժանում է ստեղծվում:
Ի՞նչ քայլեր են ձեռնարկվում, որ որակյալ ծառայությունները կենտրոնացված չլինեն միայն Երևանում, այլ հասանելի լինեն նաև հեռավոր մարզերում: Նախարարության ներկայացուցիչը նշեց, որ այդ հարցն իրենց ուշադրության կենտրոնում է և այսօր էլ այդ ուղղությամբ աշխատանքներ են տարվում: Մասնավորապես, մարզերի բուժհաստատություններում մեծ ծավալի շինարարական աշխատանքներ են կատարվել:
