Փետրվարի 24-ից ի վեր ավելի քան 5 միլիոն մարդ է լքել Ուկրաինայի տարածքը
Ավելի քան հինգ միլիոն մարդ է Ուկրաինայի տարածքը լքել փետրվարի 24-ից մինչեւ ապրիլի 19-ն ընկած ժամանակաշրջանում: Այդ մասին վկայում են ՄԱԿ-ի փախստականների գործերի գերագույն կոմիսարի վարչության (ՓԳԿՎ) պորտալում հրապարակված տվյալները:
ՄԱԿ-ի ՓԳԿՎ-ի տվյալների համաձայն, գրեթե երկու ամսվա ընթացքում Ուկրաինայից հեռացել է 5 միլիոն 31 հազար 306 մարդ: 2,8 միլիոնից ավելի փախստականներ ուղեւորվել են Լեհաստան, 757 հազարը՝ Ռումինիա, շուրջ 550 հազարը՝ Ռուսաստան, ավելի քան 471 հազարը՝ Հունգարիա: Եվս գրեթե 427 հազար մարդ մեկնել են Մոլդովա, շուրջ 343 հազարը՝ Սլովակիա, ավելի քան 23 հազարը՝ Բելառուս: Ռուսաստանը ռազմական գործողությունն Ուկրաինայում սկսել է փետրվարի 24-ի առավոտյան:
Նախագահ Վլադիմիր Պուտինը նշել է, որ իր նպատակը «մարդկանց պաշտպանելն է, որոնք ութ տարի շարունակ ծաղրանքների, ցեղասպանության են ենթարկվում Կիեւի ռեժիմի կողմից»:
Դրա համար, նրա խոսքով՝ պլանավորվում է «ապառազմականացում, դենացիֆիկացում անցկացնել Ուկրաինայում», դատի տալ պատերազմական բոլոր հանցագործներին, Դոնբասի «խաղաղ բնակիչների դեմ արյունոտ հանցագործությունների» համար պատասխանատուներին, հաղորդել է ՌԻԱ Նովոստին:
