Հանգչիր խաղաղությամբ, ուսուցիչ

«Վիրաբույժների հայկական ասոցիացիայի» և անձամ իմ անունից խորին ցավակցություն եմ հայտնում  «Վիրաբույժների հայկական ասոցիացիայի» պատվավոր նախագահ Հովհաննես Վազգենի Սարուխանյանի ընտանիքի անդամներին, հարազատներին և մերձավորներին անվանի վիրաբույժի մահվան կապակցությամբ։

Վաստակաշատ վիրաբույժի կորուստը բոլորիս կորուստն է:

Անգնահատելի է Հովհաննես Վազգենի Սարուխանյանի վաստակը Հայաստանի բժշկագիտության, մասնավորապես վիրաբուժության բնագավառում, որին նա ծառայեց բարձր պրոֆեսիոնալիզմով և անսահման նվիրվածությամբ՝ որպես բարձրակարգի բժիշկ, գիտնական և ուսուցիչ, վիրաբուժության յուրահատուկ դպրոցի հիմնադիր և ղեկավար։

Նա միշտ մեզ համար կմնա բարձր հոգևոր և բարոյական հատկանիշներով օժտված իմաստուն մարդու և ընկերոջ լավագույն օրինակ։ Պրոֆեսորի պայծառ հիշատակը միշտ վառ կմնա մեր սրտերում։

Հանգչիր խաղաղությամբ մեր բոլորի ուսուցիչ։

«Վիրաբույժների հայկական ասոցիացիայի» նախագահ

պրոֆեսոր Մ.Մ.Միրիջանյան

 Ստորև ներկայացնում ենք ԵՊԲՀ վիրաբուժուժության թիվ 3 ամբիոնի վարիչ, բ.գ.դ. պրոֆեսոր, ՀՀ գիտությունների վաստակավոր գործիչ, ԵՊԲՀ պատվավոր պրոֆեսոր Հովհաննես Վազգենի Սարուխանյանի աշխատանքային կենսագրությունը:

Տարեթիվ, ամսաթիվ, ծննդավայր

1938թ., 25 մարտի, ք. Երևան

Կրթություն

1955-1961թթ. – ԵՊԲԻ բուժկանխարգելիչ ֆակուլտետ

1961-1963թթ. – ՀՀ ԳԱԱ Սրտաբանության Գիտահետազոտական ինստիտուտում  կլինիկական օրդինատուրա  ընդհանուր վիրաբուժություն մասնագիտությամբ

Աշխատանքային գործունեություն

Բժշկագիտության ոլորտում ունի 60 տարվա գիտամանկավարժական աշխատանքի անընդմեջ ստաժ:

1988 – 2008թթ. –  ԵՊԲՀ վիրաբուժական հիվանդությունների թիվ 1 ամբիոնի վարիչ

2008 – 2011թթ. – ԵՊԲՀ վիրաբուժական հիվանդությունների թիվ 1 ամբիոնի պրոֆեսոր

2011-ից – ԵՊԲՀ վիրաբուժության թիվ 3 ամբիոնի վարին էչ, որը 2018-ին իր պատվին անվանակոչվել է պրոֆեսոր Սարուխանյանի անունով: 1987-2018-ը զբաղեցրել է ՀՀ ԱՆ վիրաբուժության գլխավոր մասնագետի պաշտոնը: Մինչ  այժմ ղեկավարում է «Էրեբունի» և «Նաիրի» բժշկական կենտրոնների վիրաբուժական կլինիկաները: Անգնահատելի դերակատարում է ունեցել Սպիտակի ավերիչ երկրաշարժի հետևանքով տուժածների և Արցախյան պատերազմում վիրավորների բուժման պրոցեսում:

Գիտական գործունեություն

1965թ. – պաշտպանել է թեկնածուական ատենախոսություն  «Սրտամկանի վերանոթավորման ներսրտապարկային վիրաբուժական մեթոդների համեմատական գնահատականը» թեմայով՝ ստանալով բժշկական գիտությունների թեկնածուի գիտական աստիճան

1969թ. – պաշտպանել է դոկտորական ատենախոսություն  «Դեղորայքային միջոցների երկարատև ինֆուզիան ռեգիոնար անոթներ` որովայնի խոռոչի օրգանների վիրաբուժական հիվանդությունների բարդությունների կանխարգելման և բուժման ժամանակ» թեմայով՝ ստանալով բժշկական գիտությունների դոկտորի գիտական աստիճան:

1987-2015թթ. Հայկական վիրաբուժական ասոցիացիայի  նախագահ

1987- 2018 ՀՀ ԱՆ վիրաբուժության գլխավոր մասնագետն է

1987թ.-ից վիրաբուժության մասնագիտական խորհրդի անդամ է

2000 թ.-ից` իր կողմից կազմակերպած Հայկական Վիրաբուժություն XXI Պրոֆեսիոնալների Միության նախագահն է

2003 թ-ին կազմակերպել է Համահայկական միջազգային վիրաբուժական կոնգրես

2007 թ-ին շնորհվել է ՀՀ Գիտությունների վաստակավոր գործչի պատվավոր կոչումը

2008թ-ին կազմակերպել էՄիջազգային վիրաբուժական կոնգրես «Անհետաձգելի վիրաբուժություն»

2010թ.-ին- ԵՊԲՀ հիմնադրման 90-ամյակին նվիրված Միջազգային Կոնգրես

2013թ.-ին կազմակերպել է Մեծահասակների վիրաբուժություն միջազգային կոնգրես

2014թ.-ին- Թիվ 1 Համալսարանական կլինիկական հիվանդանոցի 100-ամյակին նվիրված «Կլինիկական բժշկագիտության արդի հիմնախնդիրները» գիտաժողով

Ունի զգալի ներդրում ավելի քան 200 գիտական աշխատություններում, 13 ուսումնամեթոդական ձեռնարկներում, 4 դասագրքերում, 8 ռացիոնալիզատորական առաջարկներում, 9 գյուտերում:

ԽՍՀՄ-ում առաջինն է կատարել խոլեդոխոլիթիազի ժամանակ արտամարմնային հարվածող ալիքային լիթոտրիպսիա: Ուսումնասիրել և գործնականում ներդրել է սինթետիկ միջադիրների կիրառումը սրտամկանի հետինֆարկտային թուլության, պարենխիմատոզ օրգանների վնասվածքների ժամանակ: Հայաստանում առաջինն է կատարել անգիոպուլմոնոգրաֆիա, աորտո-արտերիոգրաֆիա, լիմֆոգրաֆիա, պորտոգրաֆիա, պանկրեատո-դուդենալ մասնահատում, լյարդի ձախ բլթի մասնահատում, աջ բրոնխի մասնահատում, կերակրափողի ներպլևրալ պլաստիկա հաստ աղիքով, վիրահատություններ որովայնի խոռոչի էկտոպիկ ֆեոքրոմոցիտոմայի, հարվահանաձև գեղձի ադենոմայի, ինսուլոմայի կապակցությամբ: Մշակել է ստամոքսի մասնահատման ժամանակ գաստրո-էնտերոանաստամոզի, պերֆորատիվ խոցի, ստոծանու կերակրափողային բացվածքի ճողվածքի ալոպլաստիկ վիրահատությունների, մեխանիկական դեղնուկի ժամանակ բիլիոդիգեստիվ անաստամոզների նոր մեթոդներ, որոնք ճանաչվել են որպես գյուտեր:

Նրա անմիջական ղեկավարությամբ պաշտպանվել է 7 դոկտորական և 23 թեկնածուական ատենախոսություններ

 Պարգևներ

1989թ.-  «Աշխատանքային կարմիր դրոշի» շքանշան,  ՀՀ կառավարության շնորհակալագիր ու պատվոգիր:

1989թ-ին արժանացել  է «Առողջապահության գերազանցիկ» և «ԽՍՀՄ գյուտարար-ռացիոնալիզատոր» կոչումներին:

2000թ. – «Մխիթար Հերացի» մեդալ

2006թ. – «Մարշալ Բաղրամյան» մեդալ

2007 և 2008թ. ՀՀ վարչապետի հուշամեդալ

2008թ. – ՀՀ Առողջապահության Նախարարության «ոսկի մեդալ»

2008թ. – «Անդրանիկ Օզանյան» մեդալ

2013թ.- Երևանի Մխիթար Հերացու անվան Պետական Բժշկական համալսարանի «Ոսկե հուշամեդալ»

2013թ.- Հայրենիքին մատուցած ծառայությունների համար շնորհվել է 1-ին աստիճանի շքանշան

2014թ. – «Սուրբ Սահակ, Սուրբ Մեսրոպ» մեդալ

2019թ.  շնորհվել է ԵՊԲՀ պատվավոր պրոֆեսորի կոչում

2021թ. շնորհվել է Երևանի պատվավոր քաղաքացու կոչում: