ԿԲ-ն այս փուլում տարադրամի ձեռքբերման նկատմամբ սահմանափակումների կարիք չի տեսնում
168.am-ն այսօր ԿԲ նախագահ Մարտին Գալստյանից հետաքրքրվեց՝ արդյոք այս պահին տարադրամի արտահոսքի վտանգ կա՞, և եթե այո, ապա հնարավո՞ր է՝ Կենտրոնական բանկը տարադրամի արտահոսքը կանխելու համար որոշակի սահմանափակումներ մտցնի տարադրամի ձեռքբերման նկատմամբ։
Ի պատասխան՝ ԿԲ նախագահը նկատեց, որ այս փուլում տարադրամի ձեռքբերման հարցում սահմանափակումների կարիք չկա:
«Ես գիտեմ, որ կան երկրներ, որոնք կանխիկ տարադրամի արտահոսքի վրա որոշակի սահմանափակումներ են կիրառում: Բանկային համակարգի գործընկերների կողմից որոշակի լուծումներ այդ հարցի առնչությամբ տրվել են, բայց այնպես, որ ԿԲ-ն ինչ-որ դիրեկտիվով կարգավորի այդ իրավիճակը, այս պահի դրությամբ դրա անհրաժեշտությունը չեմ տեսնում»,- ասաց Մարտին Գալստյանը:
