Նիկոլ Փաշինյան-Գագիկ Ջհանգիրյան-Սասուն Խաչատրյան-Արթուր Դավթյան քառյակը և դատական համակարգի կազմաքանդումը
«Պրեսսինգ» հաղորդաշարում Սաթիկ Սեյրանյանի հյուրը փաստաբան Երեմ Սարգսյանն է:
Բանախոսն ընդգծում է․
- 2018-ի հեղափոխությունից հետո մեր մշակույթ մտավ հայհոյանքը, այդ իշխանական ՊՈԱԿ-ը շատ ակտիվ հայհոյում էր բոլորին: Երբ իրենց սկսեցին հայհոյել՝ զգացին, որ վատ բան է, սկսեցին դրա դեմ պայքարել, վիրավորանքը քրեականացնել:
- Վստահ եմ՝ Նիկոլ Փաշինյանի հերքումը պահանջող դատարանի որոշումը բողոքարկվելու է, չեմ բացառում, որ վերադաս ատյաններն իշխանական լծակներով բեկանեն այս ակտը:
- Այն, ինչ այսօր տեղի է ունենում դատական համակարգում, նշանակում է՝ իշխանությունները խնդիր են դրել կամակատարներին առաջ մղելու, համակարգը կազմաքանդելու, չկա արդարադատության համակարգում բարեփոխում անելու ցանկություն:
- Դատավոր Բորիս Բախշիյանին կալանավորել են իր կայացրած որոշման համար, մինչդեռ այդ որոշումը կայացնելու բոլոր հիմքերը նա ուներ: Սա տարիներ անց ՄԻԵԴ-ում որակվելու է՝ որպես կոպիտ խախտում:
- Ակնհայտ ապօրինություն է ձևավորվել Գլխավոր դատախազության և ԲԴԽ-ի պրակտիկայում:
- Դավիթ Արղամանյանը դատական համակարգի ծագող աստղն է՝ վատ իմաստով:
- Դավիթ Արղամանյանը նշանակվել է որպես կալանք տվող դատավոր և քննում է հատուկ ուշադրության կենտրոնում գտնվող գործերը:
- Դատական համակարգի ներքևում և վերևում այնպիսի զույգերի են ընտրում, որոնք երբեք օրինական որոշում կայացնող չեն:
- Աղվան Հովսեփյանի կալանավորումը միջանձնային և քաղաքական խնդիրների հիմքով է կատարված:
- Ակնհայտ խտրական մոտեցման բազմաթիվ օրինակներ կան. մի դեպքում հարուցում են քրեական գործ, մեկ այլ դեպքում՝ ոչ:
- Արհեստականորեն ստեղծում են հանցագործություն, վերլուծության արդյունքում դարձնում են մի քանի ծանր հանցագործություն:
- Որոշիչ պաշտոններ զբաղեցնող անձինք անձնական խնդիրներ ունեն Աղվան Հովսեփյանի հետ, և այդ անձանց գործողություններն ակնհայտ երևում են կամակատար դատավորների միջոցով:
- Երբ դատավորները հրահանգներով են աշխատում, օրինականության մասին խոսք լինել չի կարող:
- Գագիկ Ջհանգիրյանը, ԲԴԽ-ի կազմում գտնվող իրավաբան գիտնականները չեն ներկայացնում դատական իշխանությանը. Արդարադատության նախարարություն-ԲԴԽ զույգ եղբայրների իրավիճակ է:
- Դատավորների մակագրման համակարգի երկարատև խափանումը հանցագործություն է, ամեն դրվագ ֆիքսված է, և դրանք մի օր բացահայտվելու են:
- Մհեր Արղամանյանը իշխանություններին ծառայություն մատուցել է և շարունակելու է մատուցել. Մհեր Արղամանյանը իրավունք ունի՞ ճակատագիր որոշելու, նա դատավորի օգնական էլ չպիտի աշխատի:
- Վեթինգ կատարողներն առաջին հերթին պետք է ինքնավեթինգավորվեն. ամեն քայլափոխի այնպիսի քայլեր ու արտահայտություններ են անում, որ վեթինգի կարիք ունեն:
- Այս իշխանությունները հեռահար նպատակներ ունեն, նրանց դուր չի գալիս փաստաբանների անկախությունն ու ինքնուրույնությունը:
- ԱԱԾ-ն Բորիս Բախշիյանի գործով հարցաքննել է մեղադրյալի փաստաբանին, օրենքն ուղիղ արգելում է դա, իսկ ԱԱԾ-ն խախտումը կանխելու փոխարեն՝ ինքն է կատարել:
- Սա իրավական երկիր չէ, այստեղ ասում են՝ մենք ինչ ուզում ենք՝ անում ենք, բայց ձեզ թույլ չենք տալիս:
- Մի օր գալու է այս բոլորի համար պատասխան տալու ժամանակը. միջազգային կառույցները, հասարակական կազմակերպությունները, որոնք այսօր լռում են, արձանագրում ու հավաքում են այս բոլոր ապօրինությունները՝ մի օր դրանք օգտագործելու համար: Քանի դեռ իրենց ցանկությունները կատարվում են այս իշխանությունների կողմից՝ այդ բոլորը լռում են:
- Տեղեկություններ, փաստեր ունեմ, որ ԱԱԾ-ն զբաղվել է մի խումբ փաստաբաններով: Օրինակ, ինձ մի քանի օր շարունակ մի քանի մեքենաներով հետևել են, փորձել են ուսումնասիրել որոշ փաստաբանների ֆինանսական շարժը, ընտրում են ինքնուրույնություն և անկախություն ունեցող անձանց և փորձում են հեռացնել դաշտից, մեկուսացնել, լռեցնել: