Թուրքիայում «ահաբեկչական կազմակերպության քարոզչության» մեղադրանքով գիտաշխատող է ձերբակալվել
Թուրքիայում Էլազըղի Եփրատի համալսարանի գիտաշխատող Հիֆզուլլահ Քութումը ձերբակալվել է սոցիալական մեդիայում «Բոլոր քրդերին շնորհավորում եմ սեպտեմբերյան հեղաշրջման կապակցությամբ։ Կեցցե՛ Քրդստանը» գրառման համար։ Այս մասին տեղեկացնում է ermenihaber.am-ը։
Եփրատի համալսարանի ռեկտորատի տարածած հաղորդագրությունում նշվել է, որ Քութումը սոցիալական մեդիայում «ահաբեկչական կազմակերպության քարոզչություն» է անում, այդ իսկ պատճառով նրա դեմ քրեական գործ է հարուցվել։
Ծայրահեղ ազգայնամոլական «Ազգայնական շարժում» կուսակցության (ԱՇԿ-MHP) Էլազըղի նահանգային ղեկավարը Twitter-ում լուսանկար է հրապարկել՝ ցույց տալով, որ առավոտյան Քութումի աշխատասենյակի դռան վրա Թուրքիայի դրոշն են կախել։
Ձերբակալումից առաջ թուրքական «Gazete Duvar»-ի հետ զրույցում գիտաշխատողը հասցրել է ասել միայն, որ մահվան սպառնալիքներ պարունակող հաղորդագրություններ է ստանում։
