Վահագն Չախալյանին դեռ չեն հրավիրել ՔԿ, իսկ Գլխավոր դատախազությունը, ինչպես միշտ, չի մեկնաբանում Ադրբեջանի հետ կապված թեմաները
Հոկտեմբերի 1-ին hraparak.am–ը տեղեկացրել էր, որ Ադրբեջանը միջազգային հետախուզում է հայտարարել հայազգի տարբեր գործիչների նկատմամբ՝ նրանց համարելով ահաբեկիչներ։ Այդ մասին հայտարարել է Ադրբեջանի գլխավոր դատախազը՝ մեր հայրենակիցներին մեղադրելով պատերազմական ահաբեկիչներ լինելու մեջ, և համապատասխան գրություններ ուղարկել տարբեր երկրների հատուկ ծառայություններին, այդ թվում՝ Ռուսաստանի Դաշնության հատուկ ծառայությանը։
«Մեր ձեռքում է հայտնվել հետախուզվողների ցանկը, որում 24 հայի անուն կա, որոնք հիմնականում Ռուսաստանի և Ֆրանսիայի քաղաքացիներ են, կան նաև Բելգիայի, Վրաստանի, Հորդանանի, Պաղեստինի, Սիրիայի, Բելառուսի և Ամերիկայի քաղաքացի հայեր»,- գրել էր կայքը՝ հավելելով, որ 24-ից մի քանիսը հայտնի անուններ են, օրինակ՝ ջավախքցի հասարակական-քաղաքական գործիչ Վահագն Չախալյանը, Ղրիմի հայ համայնքի ներկայացուցիչ և Ղրիմի կամավորականների միության ղեկավար, ռազմական գործիչ Արմեն Մարդոյանը, հայտնի հետախույզ Վովա Վարդանովը, հունահռոմեական ոճի ըմբիշ, ռուսաստանաբնակ Միհրան Հարությունյանը և այլք:
Փաստորեն, եթե ադրբեջանական նախաձեռնությունը հաջողի, ապա այս անձանց ցանկացած երկրում կարող են ձերբակալել և հանձնել Ադրբեջանին՝ որպես հանցագործների:
Օրեր անց կայքը գրել էր, որ Ադրբեջանի կողմից հետախուզման մեջ գտնվող հայերին Քննչական կոմիտեն հրավիրել է հարցաքննության՝ մասնավորապես հղում կատարելով Վովա Վարդանովի խոսքերին:
168.am-ի հետ զրույցում «Կամք» նախաձեռնության համակարգող և ղեկավար Վահագն Չախալյանն ասաց՝ իրեն Քննչական կոմիտե այդ հարցով չեն հրավիրել:
Վ․ Չախալյանից փորձեցինք պարզել՝ ի՞նչը կարող էր թշնամի պետության համար առիթ ու պատրվակ հանդիսանալ իր անունն այդ ցուցակում ներառելու համար:
– Արցախում պատերազմի օրերին ե՞րբ եք եղել, ի՞նչ ստորաբաժանման կազմում և ո՞ր հատվածում:
– Նախ ուզում եմ նշել, որ ես միայն ՀՀ քաղաքացի եմ, երկքաղաքացի չեմ, Վրաստանի քաղաքացիություն չունեմ: Առաջին օրից «Կամքի» տղաներով կամավորագրվել ենք և Ռուստամ Գասպարյանի կազմավորած «Սև հովազ» ջոկատի կազմում մեկնել Արցախ: Մինչև հոկտեմբերի 9-ը եղել ենք Արցախի հյուսիսային թևում, դրանից հետո գնացել ենք Հադրութ: Հրամանատար Ռուստամ Գասպարյանի հուղարկավորությանն եմ իջել, հետո էլի բարձրացել ենք, 70 հոգուց ավելի կամավորականների ջոկատ ենք հավաքել, արդեն «Կամքի» ջոկատը: Վերջում կապիտուլյացիոն փաստաթղթի ստորագրման հենց գիշերը եկել եմ: Ի դեպ, այդ փաստաթղթի ստորագրումից 1-2 ժամ անց անօդաչու սարքը հարվածել է հենց այն դիրքերին, ուր մենք դիրքավորված ենք եղել:
– Ըստ Ձեզ՝ ինչո՞ւ է Ադրբեջանը նաև Ձեր անունը ներառել այդ ցուցակում:
– Ադրբեջանցիներն, այսպես ասած, հին հաշիվներ ունեն ինձ հետ: Իսկ թե ինչու են ներառել, չեմ կարող ասել՝ միգուցե հենց նշածս հին հաշիվները նկատի ունենալով, միգուցե այն պատճառով, որ անունս հնչեղություն ունի թե՛ Վրաստանում, թե՛ նրա սահմաններից դուրս:
– Ի՞նչ հին հաշիվների մասին է խոսքը:
– Դե, ադրբեջանական պրոյեկտներին Ջավախքի մասով միշտ էլ խանգարել ենք: Բողոքի ակցիաներ ենք կազմակերպել՝ սկսած Բաքու-Ջեյհանից, ավարտած Կարս-Ախալքալաք երկաթգծի կառուցմամբ: Մինչև ինձ չձերբակալեցին, Կարս-Ախալքալաք երկաթգծի կառուցումը չկարողացան սկսել: Միայն ինձ ձերբակալելուց հետո է առաջին տեխնիկան աշխատել Ջավախքի տարածքում: Վրաստանի նախագահ Սահակաշվիլին, երբ դեմ էր արտահայտվում ինձ բանտից ազատ արձակելուն, ասում էր, որ դեռևս երկաթգծի շինարարությունն ավարտված չէ: բանտից դուրս գալուց հետո ես տեսա, որ աշխատանքի մեծ մասն արված է, և անիմաստ էր արդեն որևէ բան անելը: Արդեն ավարտական աշխատանքներ էին ընթանում: Բայց ամեն դեպքում դրանից հետո դեռ մի քանի տարի իրենք չէին կարողանում շահագործել այդ երկաթգիծը:
– Հայաստանի Հանրապետությունից պաշտպանության ի՞նչ մեխանիզմներ եք ակնկալում Ադրբեջանի շրջանառած ցուցակի մեջ ներառվելու առնչությամբ:
– Մեծ հույսեր չեմ կապում, բայց, անշուշտ, պետությունը պետք է քայլեր ձեռնարկի: Իրենք ինձ Ազգային ժողովի ընտրությունների ժամանակ ցուցակում չընդգրկեցին հենց նույն պատճառաբանությամբ, թե երկքաղաքացի եմ, սակայն կրկնում եմ, ես միմիայն ՀՀ քաղաքացի եմ, և պետությունը պետք է քայլեր ձեռնարկի իր քաղաքացուն պաշտպանելու ուղղությամբ: Ինչպես Ադրբեջանն է միջնորդել, այնպես էլ ՀՀ-ն պետք է Ինտերպոլին միջնորդի, որ այդ հետախուզումը հանվի այդ կառույցից և բոլոր այն միջազգային կառույցներից, ուր Ադրբեջանը դիմել է:
Բնականաբար, ես էլ ինչ-ինչ քայլեր կձեռնարկեմ փաստաբանիս հետ խորհրդակցելուց հետո, բայց, իհարկե, լավ կլինի, որ պետությունն աջակցություն ցույց տա: Այս իշխանությունների «անհասկանալի» վարքագծին հետևելով՝ շատ մեծ հույսեր չունեմ, և միգուցե ավելի ուրախ լինեն: Որևէ մեկի համար գաղտնիք չէ, որ հենց իշխանություններն են հիմա մի քանի գործով փորձում ինձ դատել՝ նույն հունվարի 28-ի, այսպես կոչված, կառավարության շենքի գրավման փորձի համար ու այլ դրվագներով ևս: Չեմ ուզում նախապես մեղադրել իշխանություններին, առաջ չընկնեմ:
168.am-ը դիմեց նաև Գլխավոր դատախազությանը՝ փորձելով պարզել, թե, ի վերջո, պետությունը պաշտպանության ի՞նչ մեխանիզմներ է նախատեսել իր քաղաքացիների համար, ի՞նչ է արվում, ի՞նչ ընթացակարգեր են նախատեսված:
Գլխավոր դատախազությունից նախ ասացին, որ թեման չեն մեկնաբանում:
Այս պատասխանը, մեղմ ասած, շոկային էր, որովհետև թեպետ երբեք «Ադրբեջան» արմատով հարցերի այդ գերատեսչությունը, ինչպես նաև մնացած իրավապահ մարմինները չեն պատասխանել, բայց այս դեպքում, երբ արդեն կոնկրետ անուններ են շրջանառվում, դժվար էր պատկերացնել, որ գլխավոր դատախազությունն ասելիք չունի:
Սակայն դատախազությունից, այնուամենայնիվ, ասացին, որ՝ ավելին, քան արդեն ասել են, ասել չեն կարող:
Իսկ ասել էին հետևյալը՝ «ՀՀ դատախազությունը մի քանի անգամ առիթ ունեցել է հայտարարելու, որ Ադրբեջանում ՀՀ քաղաքացիների նկատմամբ հարուցված քրեական հետապնդումները, դրանց հիման վրա հայտարարված հետախուզումներն ապօրինի են, անհիմն և ունեն ակնհայտ քաղաքական ենթատեքստ ու շարժառիթներ և հանդիսանում են Ադրբեջանի Հանրապետության ռազմաքաղաքական ղեկավարության կողմից ազգային ատելության շարժառիթներով իրականացվող պատերազմական գործողությունների տրամաբանական շարունակությունը: Նույն բնույթն ու նպատակներն ունեն նաև ազգությամբ հայ, սակայն ՀՀ քաղաքացի չհանդիսացող անձանց նկատմամբ նմանատիպ քրեական հետապնդումները: ՀՀ գլխավոր դատախազությունը այդ հետապնդումների մասին տվյալներ ստանալու դեպքում դիմում է ապօրինի հետախուզման դեմ ուղղված կանխարգելիչ քայլերի կամ համարժեք քայլերի: Նախ՝ ներկա պահին պատերազմական հանցագործություններ կատարելու համար քրեական հետապնդումներ են հարուցվել Ադրբեջանի բազմաթիվ քաղաքացիների, այդ թվում նաև՝ ԱՀ զինված ուժերի բարձրաստիճան պաշտոնատար անձանց նկատմամբ, որոնք, ի տարբերություն ադրբեջանական կողմի շինծու, հապճեպ, առանց հիմնավոր ապացույցների իրականացվող գործընթացի, հիմնված են մանրամասն իրականացվող քննությունների ընթացքում ձեռք բերվող անհերքելի ապացույցների վրա: Բացի այդ, ՀՀ գլխավոր դատախազությունը դիմում է «Ինտերպոլի» գլխավոր քարտուղարությանը՝ ապօրինի հետախուզման փորձերը կանխելու, հետախուզում հայտարարելու մասին հարցումներ ստանալու դեպքում դրանց ընթացք չտալու, նշված անձանց հետախուզման վերաբերյալ տվյալները Ինտերպոլի համապատասխան պահոցներում չներառելու և դրանց կապակցությամբ Ինտերպոլի ուղիներով որևէ համագործակցություն չիրականացնելու նպատակով: Ի դեպ, նման՝ գործնական արդյունքներ ապահոված մոտեցումը որդեգրվել և շարունակվում է դեռևս 2017 թվականից: Միջոցներ են ձեռնարկվում նաև նույն հիմնավորմամբ այլ հետախուզական ուղիներն օգտագործելու Ադրբեջանի փորձերը ևս կասեցնելու ուղղությամբ»:
Ինչպես տեսնում եք, կրկին ոչ մի անուն ու կոնկրետ փաստեր:
