5 գիրք, որ երեխաներին առաջարկում է ընթերցել Հովհաննես Գալստյանը

«Գրքերն ամենաանաղմուկն ու ամենակայունն են ընկերներից. նրանք խորհրդատուներից ամենահասանելին և իմաստունն են, և ամենահամբերատարը՝ ուսուցիչներից». Չարլզ Ուիլյամ Էլիոթ:

168.am-ի նոր շարքի հերոսն այս անգամ կինոռեժիսոր, պրոդյուսեր, «Պարալլելս Ֆիլմպրոդաքշն» կինոընկերության հիմնադիր Հովհաննես Գալստյանն է, ով 5 գիրք է առաջարկում ընթերցել մարդկանց վաղ պատանեկության տարիներին: Կից ներկայացված են ռեժիսորի մեկնաբանություններն իր իսկ առաջարկած գրքերին:

1. «Գարգանտյուա և Պանտագրյուել» – Ֆրանսուա Ռաբլե

«Երգիծական վեպ, որը ֆրանսիական նրբագեղ ու անզուսպ զվարճությամբ ծաղրի է ենթարկում իր ժամանակի հասարակական ինստիտուտներում տիրող տգիտությունն ու չտեսությունը, անկուշտությունն ու ստրկամտությունը։ Անկաշկանդ ու քննադատական մտքով ազատ քաղաքացի դաստիարակելու համար Ռաբլեի վեպն անփոխարինելի է»։

2. «Ալիսան հրաշքների աշխարհում» – Լուիս Քերոլ

«Գրող և, որ այս դեպքում շատ էական է, մաթեմատիկոս Լուիս Քերոլի սպիտակ ճագարի հետևից վազող Ալիսայի ֆանտաստիկ տեսիլքները չափազանց կարևոր են երևակայությունը խթանելու, աբսուրդին ծանոթանալու, կաղապարներից ազատվելու համար»:

3. «Թոմ Սոյերի արկածները» – Մարկ Տվեն

«Վաղ պատանեկության տարիքում շրջապատող աշխարհը բացահայտելու լավագույն ուղեցույցը՝ 12 տարեկան Թոմասի կաշվի մեջ մտնելով։ Պատմություն ընկերության, պատանեկական առաջին սիրո, մահացու վտանգի հետ առաերեսվելու մասին»:

4. «Երեք հրացանակիրները» 1844թ․, «Քսան տարի անց» 1845թ․, «Վիկոնտ դե Բրաժելոն, կամ տասը տարի անց» 1850թ․, «Կոմս Մոնտե-Քրիստո» 1844թ․ – Ալեքսանդր Դյումա

«Դյումայի ռոմանտիկ հերոսները կսովորեցնեն լինել համարձակ, անվախ, արժանապատիվ, անարդարության հանդեպ կտրուկ անհանդուրժող։ Սրանք չափազանց կարևոր առաքինություններ են, որ ձևավորվելով վաղ տարիքում, պետք կգան ամբողջ կյանքի համար»:

5. «Քսան հազար լյո ջրի տակ» – Ժյուլ Վեռն

«Տղամարդը միշտ ճանապարհորդ է, անհայտ տարածքներ բացահայտող, Կապիտան Նեմոյի ստորջրյա սուզանավը կօգնի տղաներին ինչ-որ կերպ մնալ, դիմանալ տանը և անցկացնել դեռահասությունը՝ աշխարհը նվաճելու համար բաց նավարկության դուրս գալուց առաջ»:

Անի Գաբուզյան